Per motivs da segirezza e pervia da lavurs da nettegiada dal grip è la via dal Lucmagn, curt avant il pass, serrada ad interim per tut il traffic.

Las lavurs da sondagi e da nettegiada a la via dal Lucmagn progredeschan cun tutta forza. Durant la fin d'emna fa il team da spezialists ulteriurs sondagis. Quels servan a preparar las siglientadas ch'èn planisadas l'emna proxima.

Mesiras da segirada
Previsiblamain vegni siglientà il cumenzament da l'emna chalendara 25, e suenter vegn la via nettegiada. Suenter la siglientada vegn il team d'experts – che sa cumpona da geologs e da geotecnicists – a giuditgar la siglientada sco er il grip restant ed a far ina valitaziun actuala dal privel. Silsuenter ston eventualmain vegnir allontanads ulteriurs tocs dal grip che smanatschan da crudar giu, avant che la via po vegnir averta.

Temps da serrada
Las lavurs da siglientada e da nettegiada cuntinueschan anc. Actualmain n'èsi anc betg cler, cur che la via po vegnir averta. In nov giudicament è avant maun mardi, ils 22 da zercladur 2021, a las 16.00. Per motivs da segirezza è la via dal Lucmagn serrada per tut il traffic, er per pedunas e peduns sco er per ciclistas e ciclists. Persunas che viandeschan e persunas che van cun velo da muntogna pon sviar sur las sendas da viandar u sur la via veglia. Sut www.strassen.gr.ch stattan a disposiziun la charta e la glista da plazzals actuala cun indicaziuns detagliadas davart las lavurs e davart ils impediments.

Fotografias agiuntadas:

 

ls sondagis vegnan preparads

Infurmaziuns:
- Eugen Duff, schef dal district Glion, Uffizi da construcziun bassa, tel. +41 81 257 68 80, e‑mail Eugen.Duff@tba.gr.ch
- Dumeng Schreich, manader da project Geologia, Uffizi da construcziun bassa, tel. +41 81 257 38 30, e‑mail Dumeng.Schreich@tba.gr.ch

Gremi: Uffizi da construcziun bassa
Funtauna: rg Chanzlia chantunala