Mintga onn undreschan differentas federaziuns da branscha e scolas professiunalas spezialisadas lur absolventas ed absolvents dals emprendissadis en il rom da differentas festas da diplom e da finiziun. Pervia da corona vegnan quellas ad avair lieu – sco l'onn passà – en moda virtuala u en in rom pitschen e per part er senza giasts externs. Per quest motiv preschenta l'Uffizi per la furmaziun professiunala (UCFP) ussa messadis da video da differentas persunalitads grischunas sco er da partenarias e partenaris da la furmaziun professiunala per remplazzar ils «salids uffizials» u ils «pleds festivs» che mancan eventualmain.
Festas da diplom e da finiziun porschan in rom degn per gratular a las absolventas ed als absolvents dals emprendissadis per ina finiziun curunada da success. La pandemia dal coronavirus impedescha actualmain da manar tras talas festas cun gronds dumbers da participantas e participants. A las represchentantas ed als represchentants da las branschas na resti pervia da quai nagut auter che da realisar las festas en moda virtuala u en in rom pli pitschen. Per pussibilitar a las absolventas ed als absolvents dals emprendissadis er l'undraziun meritada da vart uffiziala preschenta il UCFP quest onn messadis da video da differentas persunalitads grischunas.
In cyborg e bleras gratulantas e gratulants
En il video da var 10 minutas èn da vesair ils dus cussegliers guvernativs Jon Domenic Parolini e Marcus Caduff, la cussegliera naziunala Sandra Locher Benguerel, la vicepresidenta dal Cussegl grond Aita Zanetti, il president regiunal Christian De Tann, ils dus represchentants da l'economia Maurus Blumenthal ed Elia Lardi, la manadra da la Scola professiunala spezialisada Janina Sakobielski, la campiunessa mundiala da mastergn Irina Tuor sco er il manader dal UCFP Curdin Tuor. Moderadas vegnan las contribuziuns curtas linguisticamain maschadadas dal cabarettist indigen Luca Maurizio. Satiricamain maina el sco emprim cyborg svizzer tras ils differents salids uffizials.
Expertas ed experts indispensabels
DLas persunalitads gratuleschan en il video a las numerusas expertas ed als numerus experts da la furmaziun fundamentala professiunala frestgamain diplomads. En quest connex punctueschan ellas che las absolventas ed ils absolvents dals emprendissadis dastgian esser superbis da la prestaziun furnida, che differentas vias stettian avertas ad ellas ed ad els e che l'economia saja dependenta dad ellas e dad els. Lur engraziament sa drizza a las persunas ed a las instituziuns ch'èn participadas decisivamain al success: a las persunas participadas directamain en ils trais lieus da furmaziun manaschis d'emprendissadi, curs intermanaschials e scolas professiunalas spezialisadas, sco er ad autras persunas-clav sco ils geniturs ubain las partenarias ed ils partenaris da las absolventas e dals absolvents. Malgrà las circumstanzas spezialas pervia da corona duain las absolventas ed ils absolvents dals emprendissadis pudair giudair festas degnas da diplom e da finiziun. Cun ils salids uffizials virtuals presta il UCFP ina pitschna contribuziun en chaussa.
A partir dals 21 da zercladur 2021 stattan ils salids uffizials virtuals er a disposiziun sin la pagina d'internet dal UCFP sco er sin ils chanals da social media dal chantun Grischun.
Infurmaziuns generalas davart las proceduras da qualificaziun e davart ils examens finals
QProcedura da qualificaziun è la noziun generala per tut las proceduras, cun las qualas i vegn constatà, sch'ina persuna dispona da las cumpetenzas fixadas en il plan da furmaziun respectiv. I dat differentas proceduras da qualificaziun. La procedura da qualificaziun la pli impurtanta è l'examen final a la fin da la furmaziun fundamentala professiunala, pussaivels èn er examens parzials.
Tut tenor il tip da furmaziun che l'emprendista u l'emprendist ha absolvì, survegn ella u el a la fin da la furmaziun fundamentala professiunala terminada cun success in attestat federal da qualificaziun (AFQ) per ina furmaziun fundamentala professiunala da 3 u da 4 onns resp. in attestat federal da furmaziun professiunala (AFP) per ina furmaziun fundamentala professiunala da 2 onns. Supplementarmain a l'attestat federal da qualificaziun pon las absolventas ed ils absolvents dals emprendissadis s'acquistar l'attestat federal da maturitad professiunala, sche la furmaziun fundamentala professiunala da 3 u da 4 onns è vegnida absolvida e terminada cun ina furmaziun generala extendida.
Il chantun Grischun ha registrà durant ils ultims 5 onns en media mintga onn var 1790 proceduras da qualificaziun ch'èn vegnidas terminadas cun success. Quai correspunda ad ina quota da success da 94 pertschient. En il chantun Grischun datti var 3000 manaschis d'emprendissadi che permettan d'emprender var 160 professiuns.
Infurmaziuns:
Curdin Tuor, manader da l'Uffizi per la furmaziun professiunala, tel. +41 81 257 27 70, e-mail Curdin.Tuor@afb.gr.ch
Gremi: Uffizi per la furmaziun professiunala
Funtauna: rg Uffizi per la furmaziun professiunala