Il chantun Grischun ha publitgà quest onn per la 24. giada ina concurrenza per promover la lavur culturala professiunala. En tut èn vegnids inoltrads 25 projects.

Dapi il 1. da schaner 1998, cun l'entrada en vigur da l'emprima Lescha davart la promoziun da la cultura, vegnan publitgadas mintga onn concurrenzas per promover la lavur culturala professiunala. En quest connex vegnan concedidas contribuziuns ad ovras e stipendis a persunas che lavuran sin il champ cultural, che han in potenzial da svilup en lur activitad e che pon preschentar plans u projects concrets per lur ovra. Contribuziuns ad ovras promovan l'elavuraziun tematica da projects che persvadan or dal punct da vista cultural, ch'èn autonoms e ch'èn realisabels.

Il dretg da sa participar a la concurrenza han artistas ed artists professiunals che han lur domicil dapi almain 2 onns en il chantun Grischun u ch'èn colliads stretgamain cun il chantun Grischun u cun la cultura grischuna.

Tschintg persunas che lavuran sin il champ cultural survegnan ina contribuziun
A chaschun da la concurrenza per promover la lavur culturala professiunala da quest onn giuditgescha la Cumissiun da concurrenza 25 dumondas ch'èn vegnidas inoltradas en las suandantas spartas: sparta interdisciplinara (4), art figurativ (6), film (3), istorgia e memoria (1), litteratura (4), musica (4) e teater (3).

Il schef dal Departament d'educaziun, cultura e protecziun da l'ambient, cusseglier guvernativ Jon Domenic Parolini, ha decidì – sin proposta da la Cumissiun da concurrenza e da l'Uffizi da cultura – davart la surdada da las contribuziuns ad ovras. Las suandantas tschintg artistas ed artists han survegnì ina contribuziun da mintgamai 20 000 francs per lur ovra:

• Yvonne Gienal / Luis Coray
  Sparta: art figurativ    
  Project: "Mescal & Margriata"
• Sara Francesca Hermann     
  Sparta: teater     
  Project: "Pajaz e Palorma"
• Melanie Danuser    
  Sparta: musica
  Project: emprima EP solistica (extended play) cun Not Crazy
• Mirko Baselgia      
  Sparta: art figurativ     
  Project: "De pictura"
• Milena Stokar      
  Sparta: film     
  Project: "Quattro generazioni di donne"

   
Infurmaziuns:
- cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e-mail Jondomenic.Parolini@ekud.gr.ch
- Barbara Garbielli, manadra da l'Uffizi da cultura, tel. +41 81 257 48 01, e-mail Barbara.Gabrielli@afk.gr.ch
 

Gremi: Uffizi da cultura
Funtauna: rg Uffizi da cultura