Tgi ch'è proprietaria u proprietari da terren en Svizra, na po betg utilisar quel sco ch'el vul. I ston vegnir observadas cundiziuns generalas che vegnan prescrittas da las autoritads. Quai pon per exempel esser zonas d'utilisaziun, lingias da construcziun, zonas da protecziun da l'aua sutterrana, lieus contaminads u cunfins statics dal guaud. En quest connex sa tracti da restricziuns da dretg public da la proprietad (RDPP). Per dar a persunas interessadas in access pli simpel a tschertas RDPP, vegnan quellas unidas en in uschenumnà cataster RDPP e rendidas accessiblas al public. Cun quai è terminà in pass impurtant en direcziun d'ina infurmaziun digitala cumplessiva davart ils bains immobigliars.

Cun il cataster RDPP vegnan las infurmaziuns davart tschertas restricziuns da la proprietad da dretg public rendidas accessiblas publicamain da tuttas uras en moda centrala e digitala. Las proprietarias ed ils proprietaris da terren ed ulteriuras persunas interessadas na ston uschia betg pli contactar pliras autoritads, mabain pon constatar sur l'internet cun paucs clics, tge temas ch'èn relevants per in bain immobigliar e tgenins betg. Ultra da quai vegnan inditgads links, sur ils quals pon vegnir mussadas las disposiziuns legalas relevantas ed ils relaschs respectivs.

Electronic, gratuit ed actual
Il cataster RDPP è ina incumbensa cuminaivla da la Confederaziun e dal chantun. Actualmain cuntegna el 17 differentas restricziuns da dretg public da la proprietad dals secturs planisaziun dal territori, vias naziunalas, viafiers, plazzas aviaticas, lieus contaminads, protecziun da l'aua sutterrana, canera e guaud. Da mintga restricziun da dretg public da la proprietad vegnan administradas las geodatas da basa correspundentas (plans), las prescripziuns giuridicas (conclus) sco er las basas legalas (relaschs). Uschia vegnan las infurmaziuns correspundentas preschentadas dapertut en moda unitara e tenor il stadi actual.

Il cataster RDPP datti per tut las vischnancas dal chantun Grischun. Il cataster RDPP na remplazza betg ils documents originals giuridicamain liants, mabain metta a disposiziun las infurmaziuns correspundentas gratuitamain sin via electronica. Ultra da quai vegn il cataster actualisà permanentamain. Uschia po il chantun Grischun ademplir en moda e maniera effizienta sia obligaziun d'infurmaziun.

Infurmaziuns pli detagliadas e material da video stattan a disposiziun sin la pagina d'internet da l'Uffizi d'agricultura e da geoinfurmaziun. Il cataster sez chattais Vus sut www.oereb.geo.gr.ch.

Infurmaziuns:
Hans Andrea Veraguth, manader da la partiziun Mesiraziun e geometer chantunal, Uffizi d'agricultura e da geoinfurmaziun, tel. +41 81 257 24 61 (cuntanschibel per telefon a partir da las 11.00), e-mail Hansandrea.Veraguth@alg.gr.ch

Gremi: Uffizi d'agricultura e da geoinfurmaziun
Funtauna: rg Uffizi d'agricultura e da geoinfurmaziun