Il chantun Grischun e la vischnanca da Puschlav renoveschan il contract concernent la surpigliada d'incumbensas da la polizia communala. Uschia ademplescha la Polizia chantunala vinavant incumbensas en ils secturs da la segirezza publica, dal traffic e da l'administraziun a Puschlav.

Sco emprima vischnanca grischuna ha Puschlav surdà l'onn 2005 sias incumbensas da la polizia communala a la Polizia chantunala dal Grischun. Suenter ussa 16 onns èn las prestaziuns necessarias vegnidas verifitgadas ed il contract è vegnì renovà. Per il chantun Grischun è quai in signal impurtant per la buna collavuraziun da la Polizia chantunala cun las vischnancas e per la preschientscha da la Polizia chantunala en tut il chantun.

Repartiziun da las incumbensas e francaziun en las regiuns
Las vischnancas èn responsablas per la polizia da segirezza sin lur territoris communals. Ultra da quai adempleschan ellas incumbensas da basa da la polizia administrativa che las vegnan attribuidas da la legislaziun speziala. Questas incumbensas pon vegnir surdadas per contract a la Polizia chantunala dal Grischun. Tenor la Lescha da polizia ademplescha la Polizia chantunala dal Grischun en spezial las incumbensas da la polizia giudiziala e da la polizia da traffic, cun excepziun da la regulaziun dal traffic sin vias communalas, sco er la gronda part da l'agid uffizial e da l'agid d'execuziun. Resalvadas exclusivamain a la Polizia chantunala èn la protecziun dal stadi sco er l'applicaziun da mesiras repressivas polizialas.

La populaziun percepescha la Polizia chantunala dal Grischun cun sias patruglias e cun la francaziun en tut il chantun sco organ surregiunal. Ella procura per segirezza e per proximitad a las burgaisas ed als burgais. Pervia da quai survegn il chantun Grischun cun la renovaziun da quest contract er la confidenza sco partenari fidà.

Agiunta:
Preschentaziun da las incumbensas polizialas

Fotografia agiuntada:

Gremi: Regenza
Funtauna: rg Departament da giustia, segirezza e sanadad