La situaziun epidemiologica en il chantun Grischun è stabila. Per quest motiv èsi pussaivel d'abolir l'obligaziun da purtar ina mascrina en il sectur da la scola populara a partir dals 5 da fanadur 2021. Uschia vegn dada ina perspectiva a las scolas popularas per l'onn da scola 2021/2022.

Grazia a las mesiras da protecziun e grazia als tests da massa en las scolas han ins pudì mantegnair senza interrupziuns l'instrucziun da preschientscha en las scolas dal Grischun. La situaziun epidemiologica stabila permetta ussa d'abolir l'obligaziun da purtar ina mascrina sin l'areal da scola inclusiv en ils locals d'instrucziun sco er en ils secturs d'abitar da las instituziuns da la scolaziun speziala en las scolas popularas publicas e privatas per tut las persunas (uffants, giuvenils e persunas creschidas). Quai vala independentamain dal fatg, sch'ina scola respectivamain ina instituziun sa participescha als tests en las scolas.

L'obligaziun per scolaras e scolars da la 5. e 6. classa primara da purtar ina mascrina en las scolas ed instituziuns che sa participeschan als tests en las scolas aveva la Regenza gia abolì cun il conclus dals 6 d'avrigl 2021, quella per il stgalim secundar I cun il conclus dals 25 da matg 2021.

Infurmaziuns:
cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e-mail Jondomenic.Parolini@ekud.gr.ch

Cumpetenza: Departament d'educaziun, cultura e protecziun da l'ambient