La Regenza ha approvà in'adattaziun voluminusa dal Plan directiv en il sectur dal traffic. Il chapitel 6 «Traffic» dal Plan directiv chantunal è vegnì revedì cumplettamain. En las novaziuns èn vegnidas resguardadas er numerusas propostas da l'exposiziun publica.
Il chapitel 6 «Traffic» dal Plan directiv chantunal dal Grischun datava principalmain da l'onn 2002. Las ultimas adattaziuns vi dal text da quest chapitel dal Plan directiv èn vegnidas fatgas l'onn 2009. Dapi lura èn vegnidas adattadas praticamain mo las glistas dals objects. Pervia da quai ha il chapitel dal Plan directiv stuì vegnir revedì fundamentalmain.
Preziusa collavuraziun
Cun agid d'ina collavuraziun tranter ils uffizis e tranter ils secturs specifics èn ils cuntegns d'enfin ussa vegnids controllads e mess à jour sin fundament da las basas actualisadas e dals cuntegns dal Plan directiv, sco per exempel il Concept dal territori u il chapitel 5 «Abitadi» ch'è vegnì approvà dal Cussegl federal l'onn 2019.
En spezial èn vegnidas resguardadas novaziuns impurtantas, sco per exempel il nov Plan chantunal sectorial Velo u aspects pli novs da la mobilitad (p.ex. multimodalitad u digitalisaziun). En il medem senn è il Plan directiv vegnì cumplettà cun ils chapitels parzials «Traffic general» e «Traffic da rauba».
Viva participaziun a l'exposiziun publica
L'exposiziun publica ha chattà ina gronda resonanza. Tut en tut èn vegnidas inoltradas 49 posiziuns cun var 470 propostas da vart da las vischnancas, da las regiuns, dals chantuns e dals pajais vischins, da federaziuns, da posts spezialisads e da persunas privatas. D'ina gronda maioritad da las posiziuns è il chapitel dal Plan directiv vegnì giuditgà sco persvadent e sco cler. Il project sco tal n'è betg vegnì crititgà; percunter èn vegnidas fatgas bleras propostas d'adattaziun che pertutgavan dumondas singulas, formulaziuns specificas u l'inscripziun u la stritgada da singuls objects.
Tut las propostas èn vegnidas evaluadas e tractadas en ina collavuraziun interdisciplinara. L'Uffizi per il svilup dal territori ha integrà e resguardà en l'elavuraziun dal chapitel dal Plan directiv ina retscha da propostas, da renviaments e da puncts crititgads. Propostas che na pertutgavan betg il Plan directiv sco tal, mabain temas parents u subordinads ubain proceduras currentas, èn vegnidas communitgadas als uffizis responsabels, per che questas propostas possian eventualmain vegnir resguardadas en proceduras consecutivas.
Da l'adattaziun è vegnì exceptà il chapitel parzial «Traffic d'aglomeraziun/programs d'aglomeraziun». En il terz quartal da l'onn 2021 sto vegnir prendì il conclus davart la quarta generaziun dal Program d'aglomeraziun Cuira. L'elavuraziun da quest chapitel parzial po pervia da quai vegnir prendida per mauns pir suenter.
Il project vegn ussa inoltrà a la Confederaziun per l'approvaziun, cun la quala i po vegnir fatg quint vers la fin da l'onn 2021.
Infurmaziuns:
- cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e-mail Marcus.Caduff@dvs.gr.ch
- Jacques Feiner, manader da la partiziun Planisaziun directiva e basas, Uffizi per il svilup dal territori dal Grischun, tel. +41 81 257 23 37, e-mail Jacques.Feiner@are.gr.ch
Responsabladad: Uffizi per il svilup dal territori