Venderdi, ils 30, e sonda, ils 31 da fanadur 2021, tranter las 12.00 e las 14.00, vegnan purschidas per l'emprima giada pussaivladads da sa laschar vaccinar cunter il coronavirus en in walk-in en il center da vaccinaziun en la Halla da la citad da Cuira. En il rom d'in pilot da dus dis vegn facilità l'access a la vaccinaziun cunter il coronavirus. Ultra da quai vegn il center da vaccinaziun a Cuira puspè transferì a partir dal 1. d'avust al vegl lieu en l'Ospital da la Crusch.

En il Grischun è vegnidas dadas fin ussa var 200 000 vaccinaziuns cunter il coronavirus. Per facilitar l'access a la vaccinaziun cunter il coronavirus vegnan purschidas per l'emprima giada las pussaivladads da walk-in venderdi, ils 30, e sonda, ils 31 da fanadur 2021. Uschia survegnan persunas a partir da 18 onns mintgamai tranter las 12.00 e las 14.00 la vaccinaziun cunter il coronavirus senza preannunzia. La purschida da walk-in cumpiglia la registraziun sco er la vaccinaziun al lieu. La segunda vaccinaziun vegn alura dada ils 30 u ils 31 d'avust 2021 en il center da vaccinaziun en l'Ospital da la Crusch. Las persunas che vulan sa laschar vaccinar prendan cun sai la carta da la cassa da malsauns sco er la carta d'identitad u il passaport.

La purschida da walk-in po er vegnir duvrada per la segunda vaccinaziun, sch'i èn passads almain 28 dis dapi l'emprima vaccinaziun (emprima vaccinaziun pia avant ils 2 fanadur 2021).

Il center da vaccinaziun a Cuira mida lieu
Ils centers da vaccinaziun regiunals restan vinavant en funcziun. Ina midada datti mo per il center da vaccinaziun a Cuira. Quel vegn manà fin ils 31 da fanadur 2021 en la Halla da la citad ed a partir dal 1. d'avust 2021 alura en l'Ospital da la Crusch. La hotline da vaccinaziun resta en funcziun ed è vinavant cuntanschibla sut il numer +41 81 254 16 00 u sut impfung@amz.gr.ch.

L'Uffizi da sanadad dal Grischun recumonda a tut las persunas che vulan sa laschar vaccinar da s'annunziar ussa per la vaccinaziun. Perquai ch'i dat per il mument blers indizis ch'il chantun sto sa preparar per in augment dals dumbers da cas. I sa mussa che la vaccinaziun è l'unica alternativa per in'unda d'infecziun pli gronda l'atun. Entant che la maioritad da las persunas en il chantun è gia vaccinada, han en spezial las persunas da 40 fin 60 onns ina quota da vaccinaziun memia pitschna. La ristga da survegnir cumplicaziuns seriusas en cas d'ina infecziun cun corona è per questa gruppa da vegliadetgna bler pli gronda che la probabilitad da grevs effects secundars pervia da la vaccinaziun. Tant la transmissiun sco er la ristga per in andament gravant da la malsogna vegnan reducidas fermamain tras ina vaccinaziun cumpletta.

L'annunzia per ina vaccinaziun cunter il coronavirus è vinavant pussaivla sur la pagina d'internet www.gr.ch/impfung.

Infurmaziuns:

Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)

Responsabladad: Uffizi da sanadad