Novas purschidas cumbinadas pertutgant ils secturs da la sanadad e dal turissem duain carmalar ils proxims onns sistematicamain giasts esters e d'ordaifer il chantun da vegnir en il Grischun. Il model directiv ch'è vegnì publitgà oz e ch'è deditgà al turissem da sanadad en il chantun Grischun furma la basa strategica per in'avertura pli intensiva dal potenzial per l'economia regiunala. Uschia vegn realisà il punct central da svilup «Turissem da sanadad» dal Program da la Regenza 2017 fin 2020.

Al tema «sanadad e bainstar» ha la Regenza attestà ina impurtanza creschenta gia l'onn 2014 en il Rapport davart il svilup economic dal Grischun. Sin basa da la muntada ch'il tema ha obtegnì en la debatta dal Cussegl grond, aveva la Regenza recepì in accent correspundent en il Program da la Regenza 2017 fin 2020. Cun crear uschia novas purschidas cumbinadas pertutgant ils secturs da la sanadad e dal turissem duain vegnir attratgs sistematicamain giasts esters e d'ordaifer il chantun en il Grischun.

Model directiv dal turissem da sanadad
Il «Model directiv dal turissem da sanadad» furma la basa strategica per quest intent. Il model directiv tracta il svilup da la dumonda che resulta – ord vista da differents experts – da la conscienza da sanadad pli gronda entaifer la populaziun. Sin basa dal svilup en Svizra vegn il turissem da sanadad considerà en il model directiv sco «martgà che sto anc vegnir preparà per il Grischun». Il Grischun posseda potenzials da success considerabels per crear novas purschidas:

• provediment da la sanadad decentral e d'auta qualitad
• cumpetenzas creschidas istoricamain en la promoziun da la sanadad
• purschidas turisticas orientadas a valurs ed a senns
• cuntradas natiralas e culturalas intactas

Tenor il model directiv duain vegnir rendids accessibels ed exaurids potenzials sin ils trais champs «prevenziun», «restricziuns da la mobilitad» e «possessuras e possessurs d'abitaziuns da vacanzas». In post da coordinaziun incumbensà dal Departament da giustia, segirezza e sanadad duai garantir en quest connex er la realisaziun e la coordinaziun cun la marca graubünden.

Fin da las lavurs da la gruppa directiva
Il model directiv «Turissem da sanadad» è vegnì elavurà d'ina gruppa directiva sut l'egida da Philipp Gunzinger. L'onn 2016 è la gruppa directiva vegnida nominada da la Regenza. La gruppa directiva cun 16 represchentantas e represchentants dals secturs da la sanadad, dal turissem, da la perscrutaziun, da l'economia e da l'administraziun è s'occupada dapi lura da las pussaivladads da svilup per il turissem da sanadad en il Grischun. Ella ha survegnì diversas incumbensas. Tranter auter ha ella stuì analisar la situaziun da partenza e las tendenzas previsiblas dal svilup, definir gruppas en mira per las purschidas dal turissem da sanadad, eruir ils basegns da questas gruppas en mira, promover la coordinaziun da las activitads da las organisaziuns e dals manaschis che lavuran en il turissem da sanadad, elavurar in model per tegnair en funcziun ina plattafurma «Graubünden Health» e per elavurar il model directiv ch'è vegnì publitgà oz «Turissem da sanadad».

La gruppa directiva ha suttamess in rapport da gestiun al Departament da giustia, segirezza e sanadad. Tenor quest rapport final èn vegnidas liquidadas respectivamain iniziadas tut las incumbensas ch'eran vegnidas surdadas. La Regenza ha prendì enconuschientscha dal rapport final e schlià la gruppa directiva engraziond per ils servetschs che tala ha prestà.

La Regenza ha nominà ina cumissiun
Per transferir las lavurs en la fasa da realisaziun ha la Regenza nominà ina cumissiun. Quella duai gidar il Departament da giustia, segirezza e sanadad a realisar il punct central da svilup «Turissem da sanadad» dal Program da la Regenza 2021 fin 2024. La cumissiun vegn presidiada dad Yvonne Brigger-Vogel. En spezial ha la cumissiun l'incumbensa da coordinar ils projects en il chantun, quai en enclegientscha cun ils posts da servetsch dal chantun. Plinavant è ella in sustegn professiunal per ils projects che s'accordan cun il punct central da svilup. La cumissiun fixescha ultra da quai il program annual d'activitads e da mesiras en il sectur dal turissem da sanadad e promova la coordinaziun da las activitads da tut las organisaziuns e da tut ils manaschis che lavuran en il turissem da sanadad.

Sin la pagina d'internet www.gesundheitstourismus.gr.ch vegnan messas a disposiziun cuntinuadamain infurmaziuns davart ils projects actuals. Medemamain pussibilitescha la plattafurma ina colliaziun supplementara dals furniturs da prestaziuns en las branschas sanadad e turissem.

Agiunta:

Model directiv dal turissem da sanadad per il chantun Grischun

Infurmaziuns:

- cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e-mail Peter.Peyer@djsg.gr.ch
- cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e-mail Marcus.Caduff@dvs.gr.ch
- Philipp Gunzinger, parsura da la gruppa directiva per il turissem da sanadad, tel. +41 79 409 77 22
- Yvonne Brigger-Vogel, presidenta da la cumissiun Turissem da sanadad, tel. +41 79 457 99 00

Responsabladad: Departament da giustia, segirezza e sanadad