Il schef dal Departament da finanzas e vischnancas, cusseglier guvernativ dr. Christian Rathgeb, è sa scuntrà oz cun represchentantas e represchentants dal Padrinadi svizzer per vischnancas da muntogna. L'inscunter a Valendau ha exprimì la stima e l'engraziament dal chantun ed è er vegnì tratg a niz per in barat d'infurmaziuns.

L'onn da guerra 1940 han ils medis conjugals Olga e Paul Cattani fundà ensemen cun trais ulteriurs iniziants in'uniun cun la finamira da reducir la differenza tranter regiuns bainstantas e regiuns cun dischavantatgs economics en noss pajais. Cun sustegnair projects concrets da vischnancas, d'associaziuns, da corporaziuns e.u.v. finanzialmain deblas gida il Padrinadi svizzer per vischnancas da muntogna, che las regiuns da muntogna restian abitablas, vegnian cultivadas e tgiradas. Ils conjugals Cattani avevan persunalmain stretgas relaziuns cun il chantun Grischun. Fin al di dad oz exista ina stretga collavuraziun cun l'instituziun.

Numerusas vischnancas, corporaziuns ed associaziuns grischunas han survegnì ils ultims onns e decennis prestaziuns da sustegn voluminusas ed han uschia pudì realisar numerusas ovras d'infrastructura necessarias, senza ch'ils custs restants hajan chaschunà grevezzas exorbitantas. Tras l'intermediaziun dal Padrinadi svizzer per vischnancas da muntogna èn er naschidas intginas dunsainas da padrinadis fixs tranter vischnancas muntagnardas grischunas e vischnancas da la Bassa.

Impurtanza finanziala e strategica
Ils ultims 10 onns ha il Padrinadi svizzer per vischnancas da muntogna pajà passa 40 milliuns francs a vischnancas, a corporaziuns ed ad associaziuns en il chantun Grischun. Igl è stà in giavisch dal cusseglier guvernativ dr. Christian Rathgeb d'engraziar al Padrinadi svizzer per vischnancas da muntogna en num da la Regenza grischuna. Sco segn da stima ha el envidà ina delegaziun ad in inscunter en la Ruinaulta. «Il Padrinadi n'è betg mo ina instituziun impurtanta en reguard finanzial. El è er ina plattafurma relevanta per la chapientscha vicendaivla. Las relaziuns ch'èn vegnidas stabilidas tranter las regiuns dal pajais e las gruppas linguisticas èn da fitg gronda impurtanza per il svilup e per la coesiun en Svizra», è persvadì il cusseglier guvernativ dr. Christian Rathgeb.

La represchentanza dal Padrinadi ha cumpiglià l'anteriur cusseglier federal dr. Hans-Rudolf Merz, president, dr. Hermann Bürgi, vicepresident, Ruth Frey Commarmot, commembra da la suprastanza, Reto Hefti, expert, sco er Barbla Graf, mainagestiun. Barbla Graf è oriunda da l'Engiadina Bassa e maina il secretariat dapi passa 20 onns.

Fotografia agiuntada:

Il cusseglier guvernativ dr. Christian Rathgeb beneventa la represchentanza dal Padrinadi svizzer per vischnancas da muntogna che vegn manada da l'anteriur cusseglier federal dr. Hans-Rudolf Merz

Infurmaziuns:

- dr. Christian Rathgeb, cusseglier guvernativ, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch
- Thomas Kollegger, manader da l'Uffizi da vischnancas, tel. +41 81 257 23 81, e-mail Thomas.Kollegger@afg.gr.ch
- Barbla Graf, mainagestiun dal Padrinadi svizzer per vischnancas da muntogna, tel. +41 44 382 30 80, e-mail info@patenschaft.ch

Responsabladad: Departament da finanzas e vischnancas