A partir da glindesdi, ils 23 d'avust 2021, sa ferma il bus da vaccinaziun grischun en tut las regiuns. Cun il bus da vaccinaziun porscha il chantun – senza preannunzia – vaccinaziuns gratuitas cunter il coronavirus sco er cussegliaziuns da vaccinaziun per persunas indecisas. Plinavant datti da qua d'envi la pussaivladad da sa laschar vaccinar en interpresas.
Las experientschas d'enfin ussa han mussà che termins da vaccinaziun senza preannunzia correspundan ad in grond basegn. Perquai extenda il chantun sia spessa purschida da vaccinaziun: A partir da glindesdi, ils 23 d'avust 2021, cursescha in bus da vaccinaziun tras tut las regiuns. Fin mez settember 2021 vegnan visitadas 38 vischnancas. Quatter emnas pli tard ha lieu ina segunda tura. En il bus da vaccinaziun vegn applitgà il vaccin «Comirnaty» da Pfizer/BioNTech. Il team mobil prenda er cun sai il vaccin «Moderna», per che persunas vaccinadas l'emprima giada cun Moderna possian sa laschar vaccinar er la segunda giada. En il bus vegnan purschidas vaccinaziuns gratuitas senza preannunzia e fatgas cussegliaziuns da vaccinaziun. Las cussegliaziuns sa drizzan a persunas indecisas u a persunas che vulan sa laschar infurmar spontanamain, senza preannunzia e pli detagliadamain da persunas medicinalas spezialisadas davart la vaccinaziun cunter COVID-19, davart ils vaccins admess e davart effects secundars pussaivels.
Tgi che vul sa laschar vaccinar, prenda cun sai la carta da la cassa da malsauns sco er la carta d'identitad u il passaport e survegn – suenter in discurs preliminar cun ina persuna medicinala spezialisada – sia vaccinaziun directamain al lieu. Il bus da vaccinaziun dal Grischun, in auto da posta modifitgà, vegn administrà en collavuraziun cun las vischnancas e cun l'AutoDaPosta SA.
Survista da las pussaivladads da walk-in
Cun ils dis da vaccinaziun senza preannunzia en ils centers da vaccinaziun regiunals – las uschenumnadas pussaivladads da walk-in – vegni cuntinuà. Er là èsi pussaivel da sa laschar cussegliar davart la vaccinaziun. Ina survista da las purschidas da la vaccinaziun cunter il coronavirus senza preannunzia en ils centers da vaccinaziun vegn actualisada cuntinuadamain sin la pagina d'internet da corona dal chantun.
Vegnida adattada è er la registraziun online per la vaccinaziun cunter il coronavirus. A partir d'immediat pon persunas che vulan sa laschar vaccinar tscherner termins da vaccinaziun libers sin la plattafurma d'annunzia.
Pussaivladad da s'annunziar per vaccinaziuns en interpresas
A partir d'immediat pon plinavant interpresas porscher a lur collavuraturas e collavuraturs la pussaivladad da sa laschar vaccinar. Il formular d'annunzia correspundent per las interpresas è disponibel en l'internet. Las vaccinaziuns en interpresas vegnan coordinadas dal team chantunal da vaccinaziun. Quel metta a disposiziun il persunal sco er l'infrastructura necessaria per pudair sa laschar vaccinar directamain en l'interpresa.
La vaccinaziun cunter il coronavirus è la meglra alternativa per impedir in'unda d'infecziun pli gronda l'atun. Tant la transmissiun sco er la ristga per in andament gravant da la malsogna vegnan reducidas fermamain tras ina vaccinaziun cumpletta. Pli bleras persunas ch'èn vaccinadas e main ch'il virus circulescha en la societad ed er main persunas che daventan malsaunas u ston murir pervia dal coronavirus. La ristga da survegnir cumplicaziuns seriusas en cas d'ina infecziun cun il coronavirus è bler pli gronda che la probabilitad da grevs effects secundars pervia da la vaccinaziun.
Las staziuns dal bus da vaccinaziun, ina survista da las pussaivladads da walk-in, l'annunzia electronica per in termin da vaccinaziun sco er ulteriuras infurmaziuns èn disponiblas da tut temp sin www.gr.ch/vaccinar.
Fotografia:
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Responsabladad: Uffizi da sanadad