Il Cussegl federal ha deliberà l'avrigl 2021 la strategia d'egualitad 2030. Quella sa concentrescha sin quatter champs d'acziun: vita professiunala e publica, cumpatibilitad e famiglia, violenza specifica tenor schlattaina sco er discriminaziun. Mintga champ d'acziun cuntegna finamiras e mesiras prioritaras. Questas ultimas duain ussa vegnir concretisadas en in plan d'acziun detaglià e realisadas fin la fin da l'onn 2023. Ils chantuns han la pussaivladad da contribuir a la realisaziun da la strategia d'egualitad 2030 cun atgnas mesiras en ils champs d'acziun «vita professiunala e publica» sco er «discriminaziun».

La Regenza beneventa e sustegna la strategia d'egualitad 2030. Cun differents projects sco «egual21 – Plan d'acziun per l'egualitad en l'administraziun chantunala», «Egualitad dals salaris tar surdadas publicas» ed «Analisa da l'egualitad dals salaris» gida il chantun Grischun activamain a realisar la strategia d'egualitad 2030. Cun questas mesiras vul il chantun sa posiziunar sco patrun modern ed attractiv sco er rinforzar l'autonomia economica da las dunnas, independentamain da lur stadi civil e da lur situaziun da famiglia.

La Regenza ha approvà la revisiun parziala da la planisaziun locala ch'era vegnida concludida da la vischnanca da Mustér ils 26 da favrer 2021. Il motiv per la revisiun è in project da construcziun en il territori Gendusas/Caischavedra. En quest territori che vegn gia utilisà dal turissem en moda intensiva è previsa ina nova via da velo da muntogna tranter las duas staziuns da telefericas. Cun construir quest trail duai vegnir stgaffida ina purschida da stad attractiva per principiantas e principiants, per avanzadas ed avanzads sco er per famiglias.

©Uffizi per il svilup dal territori