L'emna passada ha l'Uffizi da chatscha e pestga survegnì in'annunzia da la populaziun davart l'observaziun d'ina ludra a Panaduz. Per casualitad è l'animal vegnì fotografà d'ina camera da surveglianza en il curtin d'ina chasa privata.

L'ultima cumprova d'ina ludra en il Grischun dal Nord datescha da l'onn 2018. Dapi lura n'è questa spezia d'animals betg pli vegnida observada en l'intschess dal Rain alpin. I vegn a sa mussar, sche las ludras pon sa mantegnair en il Grischun dal Nord, ubain sch'i sa tracta d'animals singuls che immigreschan mintgamai per in curt temp e che partan lura puspè. Per lung da l'En en l'Engiadina vegnan ludras cumprovadas regularmain dapi l'onn 2017. A partir da l'atun 2021 prevesa l'Uffizi da chatscha e pestga da far in monitoring sistematic da las ludras, cun il qual duai vegnir registrada regularmain la derasaziun da questa spezia d'animals en l'entir chantun.

Remartga:
Per proteger la sfera privata da las persunas che han observà la ludra a Panaduz, na vegn la fotografia da la camera da surveglianza betg publitgada.

Infurmaziuns:

Andrea Baumann, manader da la partiziun Protecziun dal spazi da viver e da las spezias, Uffizi da chatscha e pestga, tel. +41 81 257 38 92 (cuntanschibel per telefon da las 14.00 fin las 15.00), e‑mail Andrea.Baumann@ajf.gr.ch

Responsabladad: Uffizi da chatscha e pestga