La via da Samignun è ina part impurtanta da la rait chantunala da vias da colliaziun. Davent da Vinadi avra ella la vischnanca da Samignun ed è l'unica colliaziun da traffic sin territori svizzer. Quella vegn engrondida massivamain. Oz cumenzan las lavurs d'exchavaziun per il tunnel Val Alpetta che ha ina lunghezza da var 630 meters. Igl è previs da metter en funcziun il tunnel la stad 2024.

Suenter ch'ils tunnels Val Spelunca e Val Pischöt èn stads terminads l'onn 1995 e l'onn 2017, vegn ussa realisà il terz tunnel, il tunnel Val Alpetta, en il rom da l'engrondiment general da la via da Samignun. Las ultimas duas etappas cun ils proxims tunnels Val Cotschna e Val Mundin suondan pli tard.

Pretensiuns cumplexas al project
En tut il sectur dal project, en spezial en il traject dal tunnel da via existent, è la via fitg stretga e na correspunda betg pli a las pretensiuns d'ozendi. Ultra da quai è la via exposta a numerus privels da la natira. Durant l'enviern sto la via perquai adina puspè vegnir serrada per plirs dis pervia da lavinas. Grazia al nov tunnel Val Alpetta vegn la situaziun actuala meglierada. Cun ina ladezza da la via da 5,8 meters e cun in'autezza da 4,5 meters po il tunnel vegnir charrà en il futur en omaduas direcziuns. Quai optimescha la circulaziun dal traffic ed augmenta considerablamain la segirezza da tut las participantas e dals participants dal traffic. Cun las lavurs preparatoricas per il nov tunnel Val Alpetta èsi vegnì cumenzà entaifer il termin previs la primavaira 2018 cun l'emprima exchavaziun ost.

Las lavurs principalas cumenzan cun in grond schlop
Oz cumenzan las lavurs d'exchavaziun per il tunnel Val Alpetta che ha ina lunghezza da var 630 meters. La perforaziun dal tunnel vegn ad esser la lavur principala. Il cumenzament da las lavurs dals miniers vegn celebrà tradiziunalmain cun l'act da l'emprima siglientada. Tenor il preventiv importan ils custs per il project d'engrondiment cun ina lunghezza totala da 970 meters circa 28,6 milliuns francs.

Agiuntas:

- fegl d'infurmaziun da l'Uffizi da construcziun bassa

- plan da survista

Fotografias agiuntadas:

fotografia da la siglientada 2 / fotografia da la siglientada 3 / fotografia da la siglientada 4

fotografia dal project 1 / fotografia dal project 2 / fotografia dal project 3

Infurmaziuns:

- dr. Mario Cavigelli, president da la Regenza, Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch

- Reto Knuchel, inschigner chantunal, Uffizi da construcziun bassa, tel. +41 81 257 35 01, e-mail Reto.Knuchel@tba.gr.ch

Responsabladad: Uffizi da construcziun bassa