Questa primavaira èn vegnidas duvradas per la terza giada sin grondas surfatschas dronas cun cameras termicas per salvar ansiels-chavriel. Cun in grond engaschament da las chatschadras e dals chatschaders grischuns sco er da las puras e dals purs han ins pudì chattar uschia 476 chavrielins novnaschids ed als salvar d'ina eventuala mort tras la maschina da segar. Quai èn var 140 dapli che l'onn precedent.

Quest onn èn vegnidas duvradas 5 dronas supplementaras per salvar ansiels-chavriel. Quellas han permess da salvar 140 chavrielins dapli che l'onn precedent. Da la fin da matg fin il cumenzament da fanadur 2021 han gì lieu var 1300 sgols.

Cuntinuaziun sin in aut nivel
La primavaira sgolan actualmain tut en tut 24 dronas mintga di da segar en quasi tut las regiuns dal Grischun. L'onn passà è il salvament dals ansiels-chavriel cun dronas vegnì extendì sin ils territoris Domat, Valragn, Val d'Alvra e Tavau Claustra. L'aut nivel da success ch'è vegnì cuntanschì en il fratemp duai vegnir tegnì er l'onn proxim.

Per questa incumbensa duain vegnir engaschads dapli pilotas e pilots sco er dapli gidantras e gidanters. La proxima primavaira vegnan purschids per consequenza ulteriurs curs da perfecziunament. Da princip po mintgina e mintgin daventar pilota u pilot, sch'ella u el demussa in inschign da laschar sgular dronas ed ha interess da salvar ansiels-chavriel.

Grond engaschament da las chatschadras e dals chatschaders malgrà COVID-19
Pervia da la pandemia dal coronavirus han ils curs da scolaziun e da perfecziunament pudì vegnir realisads er quest onn mo sut cundiziuns pli difficilas. Tuttina è l'interess per questas scolaziuns fundamentalas e per ils curs da perfecziunament stà grond cun mintgamai 40 participantas e participants. La primavaira èn uschia en acziun var 190 pilotas e pilots a favur dals ansiels-chavriel, e quai mintgamai baud la damaun u tard la saira. Las pilotas ed ils pilots da las dronas sco er lur gidantras e gidanters sa recruteschan per gronda part da las secziuns da chatschadras e chatschaders da las regiuns pertutgadas. Tut tenor la regiun coordineschan las secziuns, il guardiaselvaschina cumpetent e la pura u il pur pertutgà las intervenziuns, ubain che las secziuns surpiglian quai en atgna reschia. Aposta per quest intent han las chatschadras ed ils chatschaders endrizzà in servetsch da pichet. Senza la prontezza da las chatschadras e dals chatschaders e senza la collavuraziun cun las puras ed ils purs na pudess il project betg vegnir realisà.

Infurmaziuns:

Regula Bollier, Uffizi da chatscha e pestga, tel. +41 81 257 21 66 (cuntanschibla per telefon da las 10.00 – 12.00), e-mail Regula.Bollier@ajf.gr.ch

Responsabladad: Uffizi da chatscha e pestga