La chadaina da salvament per terra, en l'aria ed en l'aua è garantida en il Grischun. La Centrala dal clom d'agid sanitar 144 dal Grischun è vegnida examinada detagliadamain e certifitgada da la Interassociaziun per salvament.

La Centrala dal clom d'agid sanitar (Centrala 144) è ina interpresa dal salvament preclinic ch'è en servetsch durant 24 uras. Independentamain dal temp, dal di da l'emna u dal firà – sch'i dat in clom d'urgenza quinta mintga minuta. Persunas en situaziuns d'urgenza duain pudair sa fidar ch'ina persuna cumpetenta prendia encunter svelt il clom d'urgenza, ch'ella reageschia en moda professiunala e ch'ella dumondia immediatamain agid sche necessari. La Centrala 144 GR è vegnida examinada detagliadamain e certifitgada da la Interassociaziun per salvament IAS.

La garanzia da la qualitad è centrala en il sectur da sanadad
La qualitad n'è betg casuala, mabain resulta, sch'ins guarda exactamain, analisescha e meglierescha adina. Saja quai la structura, il process u il resultat, la chadaina da salvament sto funcziunar davent dal cumenzament fin a la fin. Tut ils secturs ston vegnir involvids, davent da l'administraziun sur il management dal persunal sco er sur la collavuraziun cun la clinica fin a la tecnica. En 54 puncts è l'interpresa Centrala 144 GR vegnida examinada detagliadamain, analisada ed optimada areguard la qualitad, quai integrond las collavuraturas ed ils collavuraturs. Las relaziuns geograficas dal chantun èn stadas ina sfida supplementara. L'Uffizi da sanadad sa legra ussa da communitgar che la Centrala 144 GR ademplescha tut ils puncts cun il standard il pli aut.

En cas medicinals d'urgenza: numer d'urgenza 1 4 4
Il numer d'urgenza 144 è il numer per cas medicinals d'urgenza. Las emploiadas ed ils emploiads da la Centrala 144 GR garanteschan il manaschi da di e da notg. Els alarmeschan e coordineschan ils meds d'intervenziun e da salvament necessaris. Plinavant cusseglian els tut las persunas che tschertgan agid e cussegl en dumondas da la medischina d'urgenza ed intermedieschan medias e medis da servetsch, oculistas ed oculists, dentistas e dentists sco er apotecas per cas d'urgenza.

Dapli infurmaziuns: www.144.gr.ch

Infurmaziuns:

• cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e-mail Peter.Peyer@djsg.gr.ch
• Rudolf Leuthold, manader da l'Uffizi da sanadad, tel. +41 81 257 26 41, e-mail Rudolf.Leuthold@san.gr.ch
• Sergio Marino Calabresi, manader da la Centrala dal clom d'agid sanitar 144 dal Grischun, tel. +41 81 257 78 01, e-mail Sergio.Calabresi@144.gr.ch

Responsabladad: Departament da giustia, segirezza e sanadad