La Regenza ha deliberà la missiva tar la revisiun parziala da la Lescha davart ils dretgs politics. Da nov duai la votaziun per correspundenza sin via postala daventar gratuita per las votantas ed ils votants. Ils custs da porto surpiglia il chantun. Uschia duai vegnir augmentada la participaziun a las votaziuns ed a las elecziuns.

Cun introducir la votaziun per correspundenza senza custs da porto realisescha la Regenza l'incumbensa Hug dal Cussegl grond ch'ella ha survegnì en la sessiun d'october 2019. Supplementarmain a las trais pussaivladads gratuitas per votar sin plaun federal e chantunal ch'existan gia oz – la votaziun a l'urna, la votaziun anticipada tar in post designà da la vischnanca sco er la votaziun per correspundenza cun metter la charta en la chascha da brevs da la vischnanca – duai da nov er la votaziun per posta daventar gratuita.

En il futur material da votar prefrancà
Il material per las votaziuns e per las elecziuns federalas, chantunalas e communalas duai vegnir munì ordavant da las vischnancas cun ina francatura A. Quella è integrada sut l'adressa en in code datamatrix. Uschia pon las votantas ed ils votants far diever d'ina consegna da la vusch per posta gratuita fin il venderdi avant il scrutini. Sin basa dal code datamatrix pon vegnir eruids ils custs da porto effectivs.

Agiunta:

Infurmaziuns:

president da la Regenza dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch

Responsabladad: Regenza