En concordanza cun la strategia chantunala d'immobiglias ha la Regenza approvà l'installaziun d'in center administrativ regiunal a Puschlav cun var 17 plazzas da lavur. Ils sis servetschs chantunals Polizia chantunala, Servetsch social regiunal, Intermediaziun regiunala da lavur, Cussegliaziun da professiun, Inspecturat da scola e da scolina sco er Servetsch psicologic da scola duain vegnir reunids en in edifizi administrativ a Puschlav.

Il fanadur 2019 ha il chantun avert in nov post da la Polizia chantunala grischuna en l'immobiglia a la Via da Spultri 42. L'edifizi d'abitar e da lavur è en proprietad da la Confederaziun svizra che vegn represchentada tras l'Uffizi federal per edifizis e logistica (UFEL). Cun metter a disposiziun il post da polizia han ins percurschì il potenzial da l'immobiglia per installar in center administrativ regiunal. L'immobiglia è situada en in lieu central e bain accessibel ed è cuntanschibla senza problems per la clientella da l'administraziun. Il UFEL è sa declerà pront da dar en locaziun al chantun Grischun a vista pli lunga las localitads che sa chattan en l'immobiglia a la Via da Spultri 42/44 e ch'èn necessarias per il center regiunal a Puschlav. La collavuraziun tranter la Confederaziun ed il chantun, che ha cumenzà cun success cun la realisaziun dal post da la Polizia chantunala grischuna, po pia vegnir extendida.

La Regenza ha approvà la dumonda dal gimnasi e da l'internat da la claustra da Mustér d'endrizzar tschintg chombras singulas en la chasa da dimora ed ha deliberà ina contribuziun chantunala da maximalmain 100 000 francs per quest intent.

Actualmain stattan a disposiziun a la chasa da dimora da la claustra da Mustér 53 chombras singulas (22 per mattas e 31 per mats), ch'èn tuttas occupadas per il mument. Las 53 chombras existentas n'èn betg cuntanschiblas senza obstachels. Scolaras e scolars cun impediments da chaminar stuevan vegnir collocads fin ussa en il sectur d'hotel u en la partiziun d'ospital da la claustra da Mustér. En il terz plaun betg utilisà dal tract «Sulser» duain vegnir endrizzadas ussa tschintg chombras singulas senza obstachels.

Visualisaziun d'ina chombra, ©claustra benedictina Mustér

La Regenza ha concludì d'adattar il Plan directiv chantunal e regiunal concernent il territori da skis da Flem – Laax. L'element principal da quest plan directiv è la realisaziun da l'uschenumnà Masterplan 2028. Il Masterplan 2028 è resultà, suenter ch'ins ha sviluppà vinavant il Masterplan 2010 fin 2015, ch'è cuntegnì en il plan directiv vertent.

Ina part centrala dal nov masterplan è la realisaziun d'in stabiliment d'apport (pendiculara) senza interrupziun sin l'axa da Flem – Foppa – Startgels fin a la chamona dal Segnas e vinavant fin a Nagens sura cun in spartavias per Ils Cugns. Quest stabiliment planisà en il territori da recreaziun intensiva «Arena Alva» remplazza concepziunalmain d'ina vart l'avertura per Cassons (gia l'onn 2018 è la teleferica da Naraus – Cassons vegnida demontada) sco er la sutgera da Foppa – Naraus (sutgera d'apport, che vegn demontada senza cumpensaziun) ed ils anteriurs stabiliments da Flem – Foppa (stabiliment d'apport, che vegn remplazzà sin il trassé existent), da l'autra vart er la teleferica veglia da Startgels – Grauberg (implant da diever, demontascha).

La Confederaziun sto anc approvar questa adattaziun dal Plan directiv chantunal. Quai è la premissa per che la Regenza possia approvar la revisiun necessaria da la planisaziun locala.

©swisstopo

DLa Regenza ha mess en vigur la revisiun parziala da la Constituziun chantunala (art. 27 al. 2 CC) e la Lescha davart l'elecziun dal Cussegl grond (LECG) per il 1. d'october 2021. Plinavant ha ella relaschà l'Ordinaziun davart l'elecziun dal Cussegl grond (OECG).

A chaschun da la votaziun chantunala dal pievel dals 13 da zercladur 2021 aveva il pievel grischun acceptà l'introducziun da la procedura electorala da proporz per las elecziuns dal Cussegl grond.

La Regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel dumengia, ils 28 da november 2021:

• iniziativa dal pievel dals 7 da november 2017 «Per in sectur da tgira ferm (Iniziativa da tgira)»;
• iniziativa dal pievel dals 26 d'avust 2019 «Nominaziun da las derschadras federalas e dals derschaders federals en ina procedura da sort (Iniziativa da giustia)»;
• midada dals 19 da mars 2021 da la Lescha federala davart las basas legalas da las ordinaziuns dal Cussegl federal per superar l'epidemia da COVID-19 (Lescha COVID-19) (cas da direzza, assicuranza cunter la dischoccupaziun, tgira d'uffants cumplementara a la famiglia, persunas che lavuran sin il champ cultural, occurrenzas).

Sin plaun chantunal n'èn previs nagins projects da votaziun per ils 28 da november 2021.