Il cusseglier guvernativ Marcus Caduff, parsura da la Conferenza da las directuras e dals directurs chantunals da l'economia publica Ost (CDE Ost), ha retschavì oz sias collegas d'uffizi da la Svizra Orientala a chaschun da la radunanza annuala da la CDE Ost a Laax. Ultra da la radunanza ordinaria ha gì lieu l'inspecziun da la senda da tschimas la pli lunga dal mund.
La radunanza annuala da la CDE Ost è stada sut l'ensaina dal barat d'experientschas pertutgant las sfidas da l'economia publica en connex cun la pandemia da COVID‑19. Dapi il cumenzament da la pandemia funghescha la CDE Ost sco gremi da coordinaziun regular per mesiras da la Confederaziun e dals chantuns da la Svizra Orientala. A Laax ha il cusseglier guvernativ Marcus Caduff engrazià per la buna collavuraziun durant ils ultims mais.
Suenter la part formala da la radunanza èn las directuras ed ils directurs chantunals preschents sa rendids sin la Senda dil Dragun, la pli lunga senda da tschimas dal mund. Sa basond sin la Lescha per il svilup economic aveva il chantun sustegnì cun ina contribuziun las investiziuns en l'attracziun populara da la destinaziun Flem Laax Falera.
Fotografia agiuntada:
Commembers da la CDE Ost sin la senda da tschimas
Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel +41 81 257 23 01, e‑mail
Marcus.Caduff@dvs.gr.ch
Responsabladad: Departament d'economia publica e fatgs socials