Suenter in temp da construcziun da quasi 11 onns vegn festivada ils 9 d'october 2021 la finiziun da las lavurs da construcziun vi da la via da Tràn che cumpiglia – sco element central – il tunnel Plattas d'ina lunghezza da 440 meters. Tràn survegn uschia ina colliaziun segira e transibla durant l'entir onn, ch'è admessa per vehichels d'in pais maximal fin 32 tonnas.
La via da Tràn dat access a l'anteriura vischnanca da Tràn, oz ina fracziun da la vischnanca da Tumleastga, sin in'autezza da 1480 meters sur mar. L'access oriund manava – sco via natirala – da Pasqual sur Dusch e sur Vecs fin Tràn. La via era taissa e stretga. Ultra da quai aveva ella pliras stortas stretgas, uschia ch'igl era pussaivel da cruschar mo en paucs lieus. Cun camiuns na pudevan ins betg cuntanscher Tràn.
Nov trassé e colliaziun da via moderna
La renovaziun successiva da la via da Veulden ha permess da colliar Tràn l'onn 1991 per l'emprima giada tras ina via da guaud davent d'in spartavias situà sur Rofna. Uschia ha pudì vegnir guntgida la stretga a Dusch. L'onn 2010 han ins cumenzà a construir il nov trassé da la via nova da Tràn. Questa via sa sparta davant il tunnel Tgiern da la via da Veulden e maina sin il trassé d'ina via da guaud existenta tar il nov tunnel Plattas. Il tunnel d'ina lunghezza da 440 meters è vegnì construì durant ils onns 2013/2014 en la moda d'in avanzament cun siglientadas. Sut Vecs sbucca la via puspè en il trassé oriund e suonda quel fin Tràn. Pervia da la cuntrada taissa èsi stà necessari da construir plirs mirs da sustegn. Il mantegniment da la circulaziun dal traffic durant las lavurs da construcziun è stà ina sfida sin la via da mo in vial, tant per las parts participadas a la construcziun sco er per las participantas ed ils participants dal traffic. L'onn 2021 è la finala vegnì engrondì il traject en il vitg da Tràn ed a medem temp èn vegnids remplazzads ils conducts d'ovra da la vischnanca.
Implant fotovoltaic per il provediment d'electricitad dal tunnel
Igl è previs da producir sez ina part dal basegn d'electricitad per il tunnel Plattas, quai cun agid d'in implant fotovoltaic. L'implant vegn probablamain a vegnir installà l'onn 2022 sin il mir da sustegn expost al sulegl da la vart da la val tar il portal meridiunal.
Fotografias agiuntadas:
Foto 2, Foto 3
Agiuntas:
Infurmaziuns:
- dr. Mario Cavigelli, president da la Regenza, Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
- Reto Knuchel, inschigner chantunal, Uffizi da construcziun bassa dal Grischun, tel. +41 81 257 35 01, e-mail Reto.Knuchel@tba.gr.ch
- Werner Natter, president communal da Tumleastga, tel. +41 81 650 13 15, e-mail gemeindepraesident@domleschg.ch
Responsabladad: Departament d'infrastructura, energia e mobilitad