En il center da vaccinaziun a l'Ospital da la Crusch vegn utilisà a partir dad oz il vaccin COVID-19 Vaccine Janssen. En il decurs da l'emna suondan ils nov ulteriurs centers da vaccinaziun. A la populaziun dal chantun stattan per entant a disposiziun 3450 dosas da quest vaccin vectorial. Dapi il 1. d'october 2021 èn s'annunziadas 400 persunas per ina vaccinaziun cun Janssen.
Per sa laschar vaccinar cun COVID-19 Vaccine Janssen dovri per il mument anc in'annunzia online. Tut tenor la dumonda vegn il vaccin prendì cun sai dal team da vaccinaziun mobil en il rom da la terza tura, u injectà da las medias e dals medis da chasa.
Il vaccin COVID-19 Vaccine Janssen vegn recumandà a persunas a partir da 18 onns che na pon betg sa laschar vaccinar cun in vaccin mRNA per motivs medicinals (cunterindicaziun medicinala) ed a persunas a partir da 18 onns che refusan ils vaccins mRNA. Per entant è quest vaccin resalvà a persunas che abitan en il Grischun. L'immunisaziun cun Janssen na vegn betg recumandada a dunnas en speranza sco er a persunas cun in sistem d'immunitad supprimì. A la gruppa da persunas cun in sistem d'immunitad supprimì dattan vaccins mRNA ina meglra resposta immunitara.
Ina survista da las pussaivladads da walk-in (cun vaccins mRNA) e l'annunzia electronica per in termin da vaccinaziun sco er ulteriuras infurmaziuns èn disponiblas da tut temp sin www.gr.ch/vaccinar. A chaschun da l'annunzia, suenter l'endataziun da las datas, pon ins dumandar da survegnir il vaccin COVID-19 Vaccine Janssen.
Infurmaziuns:
Post da communicaziun per il coronavirus dal chantun Grischun, e-mail
kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias).
Cumpetenza: Uffizi da sanadad