La Regenza ha approvà il project d'exposiziun per renovar la via dal Bernina a Puschlav al sid da Sfazù fin a l'entrada da la Val di Campo. Il traject tranter Morteratsch e Puschlav è vegnì schlargià il cumenzament dals onns 1970 ad ina ladezza dal vial da 6 meters. Dapi lura èn vegnidas fatgas mo pli lavurs da mantegniment. Il nausch stadi da la via sin il traject dal project tranter il restaurant Pozzolascio e la fin da la plazza da deposit da laina Abrüsù è d'attribuir primarmain a l'augment dal volumen da traffic en cumbinaziun cun ils fundaments memia debels da las construcziuns da sustegn.
En il rom dal project duain perquai vegnir renovadas la surstructura e la surfatscha dal traject da via sin ina lunghezza da circa 1,7 kilometers. Plinavant èsi planisà da schlargiar la via existenta inclusiv il vial da velo da la vart da la muntogna per detretschar il traffic. Ultra da quai han plirs projects communals consequenzas per las lavurs da renovaziun, per exempel la realisaziun dal parcadi public «Pozzolascio». La construcziun da quest parcadi premetta in'ulteriura adattaziun da la via chantunala sin ina lunghezza da circa 145 meters sco er in nov vial per sviar a sanestra, ina insla da segirezza per peduns ed in uschenumnà sectur da distanza da vista. Quai tut sto vegnir realisà il cumenzament dal project. Ils custs totals per il project da renovaziun importan var 31,3 milliuns francs. Da quels resultan circa 0,2 milliuns francs per la part da la vischnanca da Puschlav (parts vial per sviar a sanestra ed insla da segirezza per peduns).

Il project d'exposiziun per curreger il traject «gallaria Camp» da la via da Val S. Pieder è vegnì approvà da la Regenza. L'attenziun principala da las lavurs planisadas vegn dada a la ladezza da la via che na correspunda betg pli a las pretensiuns d'ozendi envers ina via chantunala. Perquai che sia surstructura n'è betg resistenta a la schelira, è la via ultra da quai donnegiada e demussa defurmaziuns che derivan da quests donns.
En il rom dal project duai la via perquai vegnir schlargiada a 6 meters tranter il portal sid da la gallaria Camp e l'edifizi da manaschi da las Funtaunas d'aua minerala da Val S. Pieder. Plinavant èsi previs da renovar la surstructura da la via, l'allontanament da l'aua e las construcziuns artifizialas. En il rom dal project vegn medemamain construì in nov passape da la vart da la muntogna. Tenor las basas legalas tutgan ils passapes al champ da cumpetenza da las vischnancas. Per quest project d'exposiziun ha il chantun dentant surpiglià la projectaziun per incumbensa da la vischnanca. Il chantun surpiglia er la funcziun da patrun da construcziun e l'acquist da terren, ils custs per quai van però a quint da la vischnanca. Ils custs da quest project importan tut en tut circa 3,5 milliuns francs. Ils custs per il passape importan previsiblamain var 400 000 francs.

La via da Seraplana, ina via chantunala da colliaziun, sa sparta en l'Engiadina Bassa, tranter Ramosch e Tschlin, da la via d'Engiadina e dat access al vitg da Seraplana. La via natirala dad oz ch'è cuvrida cun ina simpla stresa na correspunda betg pli als standards da construcziun actuals. Perquai ha la Regenza dà glisch verda per curreger il traject da via tranter il spartavias da la via d'Engiadina e l'entrada dal vitg da Seraplana.
Il project che cumpiglia il traject da via d'ina lunghezza da circa 720 meters, prevesa tranter auter da renovar tut il trassé e da construir in nov allontanament da l'aua. Ultra da quai vegn transfurmada la geometria dal sectur da la sbuccada en la via d'Engiadina. Quai pretenda in entagl pli grond da la vart da la muntogna e la construcziun d'in nov mir da sustegn. Sin giavisch da la vischnanca da Valsot vegn plinavant construida ina senda davent da la via da Seraplana fin tar la fermada dal bus sper la via d'Engiadina. Las pedunas ed ils peduns pon uschia arrivar directamain tar la fermada, senza stuair duvrar la via d'Engiadina. Ils custs totals da quest project importan circa 2,27 milliuns francs.

En la Val Cahermen tar Fidaz hai dà ina bova l'avrigl 2018. Quella ha donnegià in curtin d'ina chasa sco er terren cultivà. Gia l'avust 2017 han ins stuì intervegnir suenter ina bova en la Val Pintga. Per quest motiv è il sectur da privel alura vegnì examinà detagliadamain. Per incumbensa da la vischnanca da Flem ha l'Uffizi da guaud e privels da la natira sin quai elavurà il project «Protecziun cunter aua gronda per ils auals a Fidaz» per realisar mesiras per reducir la situaziun da privel. Il project ha la finamira da garantir la protecziun dal territori d'abitadi. Per quest intent duain tranter auter vegnir adattadas vias, auzads mirs e construì in rempar da terra en il sectur da privel.
La Regenza ha approvà quest project ed ha garantì a la vischnanca ina contribuziun chantunala da 185 000 francs per realisar il project. Il project vegn realisà en duas etappas da construcziun e duai vegnir terminà l'onn 2022.

Il chantun Grischun ha fatg ina cunvegna da prestaziun cun l'Organisaziun per donns da terratrembels (ODT). La cunvegna ch'è vegnida approvada da la Regenza, cumpiglia la gestiun d'ina organisaziun che registrescha e che examinescha suenter in terratrembel ils edifizis donnegiads e che fa ina stimaziun en scrit dals custs da reconstrucziun e da reparatura. La ODT serra qua tras ina largia en las mesiras preparatoricas per in terratrembel e gida che l'economia e che la societad possian puspè sa restabilir suenter in terratrembel entaifer in termin adequat. Ils custs che resultan en quest connex per il chantun sa cumponan d'ina contribuziun unica da var 65 500 francs per la fasa iniziala e da custs annuals da circa 18 500 francs.

La Regenza ha approvà la revisiun parziala da la planisaziun locala da Cazas, concludida da la vischnanca ils 13 da december 2020. Uschia vegnan stgaffidas las premissas da la planisaziun d'utilisaziun per engrondir la deponia da luadiras ad Unterrealta.
Sch'il rument vegn ars, datti luadiras. Betg tut quai che vegn ars, fa mo fim e flommas. Las luadiras che restan enavos, vegnan elavuradas e depositadas en ina deponia segirada. La deponia ad Unterrealta è en funcziun dapi l'onn 1997. Las luadiras depositadas là derivan per gronda part dal stabiliment per arder ruments GEVAG a Trimmis. Quest engrondiment garantescha la dismessa da luadiras en il chantun Grischun per ils proxims 30 fin 40 onns.

©Comet Photoshopping GmbH, Dieter Enz