Il Partenz registrescha il mument in grond augment da novas infecziuns da COVID-19. Pertutgà è tranter auter l'ospital regiunal a Schiers. L'Uffizi da sanadad dal Grischun recumonda urgentamain, da sa tegnair vi da las reglas da distanza e d’igiena e d’evitar grondas fullas da glieud. A las scolas da la regiun vegni recumandà da testar las scolaras ed ils scolars sco er in’obligaziun da purtar mascrinas.

En la regiun dal Partenz vegn registrà in grond augment dad infecziuns da COVID-19. Actualmain dumbra il Partenz var in terz da tut ils cas activs en il Grischun. La derasaziun dal coronavirus maina ad in augment da las ospitalisaziuns pervi da COVID-19 ed uschia ad ina situaziun tendida tar il provediment da sanadad da la regiun.

Perquai che la staziun da pandemia da l'ospital da Schiers è fermamain als cunfins da la capacitad e perquai che er collavuraturas e collavuraturs da l’ospital èn vegnids testads positiv, ha l'ospital da Schiers intensivà las mesiras da protecziun. Tut las collavuraturas ed ils collavuraturs da la Fundaziun Flury – tar quella tutga l’ospital – ston purtar ina mascrina FFP2.

Tegnair distanza e lavar regularmain ils mauns
L'Uffizi da sanadad dal Grischun cusseglia urgentamain da tegnair ina distanza minimala dad 1,5 meters, da sa proteger cun ina mascrina per la fatscha e da lavar regularmain ils mauns. Er duain fullas da glieud vegnir evitadas per entant.

En vista al cumenzament da la scola da proxim glindesdi recumonda l’Uffizi da sanadad dal Grischun als purtaders da las scolas, da manar tras consequentamain ils tests en las scolas e d’introducir temporarmain in’obligaziun da purtar ina mascrina.

L'Uffizi da sanadad dal Grischun observa cuntinuadamain la situaziun e vegn en cas da basegn a prender mesiras per limitar las infecziuns.

Infurmaziuns:

Cumpetenza: Uffizi da sanadad