La Regenza grischuna ha reelegì Peter A. Fanconi sco president ed Ines Pöschel sco cussegliera da la Banca chantunala grischuna (BCG) per la perioda d'uffizi dal 1. d'avrigl 2022 fin ils 31 da mars 2026.
Ils 31 da mars 2022 termineschan las periodas d'uffizi dal president da la banca Peter A. Fanconi e da la cussegliera da banca Ines Pöschel. La Regenza ha prolungà lur mandats respectivs per 4 onns fin ils 31 da mars 2026.
Il giurist Peter A. Fanconi ha 54 onns ed abita a San Murezzan. El è dapi l'onn 2014 commember dal cussegl da banca ed è parsura dal comité da strategia. El è vegnì reelegì tar la BCG pervia da sia activitad da plirs onns ch'è stada curunada da fitg grond success. Sco impressari e spezialist da banca è el tranter auter president dal Cussegl d'administraziun da la EFG International SA e da la BlueOrchard Finance SA, ina societad dominanta sin plaun mundial en il sectur da la microfinanza per cumbatter la povradad en pajais da svilup.
L'advocata da 53 onns, Ines Pöschel, abita a Turitg. Ella è dapi l'onn 2018 en il cussegl da banca e commembra dal comité da strategia. La Regenza l'elegia pervia da sia experientscha cumprovada da blers onns en il dretg d'economia general sco er en il sectur da las bancas e dals servetschs finanziars. Ses champs da lavur centrals èn il dretg dal martgà da chapital ed il dretg da societads sco er funcziuns strategicas sco cussegliera d'administraziun u sco cussegliera da fundaziun.
Tenor la Lescha davart la Banca chantunala grischuna è la Regenza cumpetenta per eleger il cussegl da banca che sa cumpona da set persunas. Las elecziuns en il cussegl da banca han lieu resguardond las prescripziuns da l'Autoritad federala per la surveglianza dals martgads da finanzas (FINMA) ed il profil d'exigenzas da la Regenza per il cussegl da banca.
Fotografias agiuntadas:
Peter A. Fanconi
Ines Pöschel
Infurmaziuns:
cusseglier guvernativ Christian Rathgeb, schef dal Departament da finanzas e vischnancas, tel. +41 81 257 32 01, e‑mail Christian.Rathgeb@dfg.gr.ch
Responsabladad: Regenza