Durant l'Emna naziunala da vaccinaziun sa concentrescha l'Uffizi da sanadad sin l'infurmaziun e sin ina vasta purschida da cussegliaziun. Las cussegliaziuns da vaccinaziun tar las medias ed ils medis da chasa èn gratuitas il november. Las purschidas per vaccinaziuns senza preannunzia vegnan extendidas fermamain per l'emna dals 8 fin ils 14 da november 2021. Ultra da tut ils centers da vaccinaziun porschan er apotecas sco er medias e medis da chasa la pussaivladad da walk-in en il chantun.
Perquai ch'ils dumbers da cas s'augmentan e per evitar novas restricziuns, recumonda l'Uffizi da sanadad urgentamain da sa laschar vaccinar cunter COVID-19. La finamira da l'Emna da vaccinaziun èsi da mussar – cun infurmaziuns objectivas – ils avantatgs d'ina vaccinaziun cunter COVID-19 e d'eliminar las temas da la vaccinaziun, ch'èn derasadas. En collavuraziun cun las vischnancas, cun las medias ed ils medis da chasa, cun ils centers da vaccinaziun, cun las apotecas sco er cun ils ospitals vegnan las pussaivladads da cussegliaziun e da vaccinaziun en tut il chantun extendidas fermamain durant l'emna dals 8 fin ils 14 da november 2021. Sin la pagina d'internet dal chantun figureschan tut las purschidas.
Actualmain èn vaccinads en il chantun 67,7 pertschient da la populaziun. Ils dumbers da cas actuals laschan dentant supponer che la quota da vaccinaziun en intginas regiuns è lunsch sut la media chantunala. 95 pertschient dals cas da COVID-19 sin las staziuns intensivas èn persunas betg vaccinadas. L'Uffizi da sanadad ha l'incumbensa da tegnair a disposiziun las plazzas da la medischina intensiva per cas d'urgenza da tut la populaziun. Sche questas plazzas vegnan occupadas da las pazientas e dals pazients da COVID-19, n'è quai betg pli garantì.
La vaccinaziun protegia cunter grevs decurs
Bain pon ins s'infectar cun COVID-19 malgrà la vaccinaziun. En la gronda part dals cas è il decurs da la malsogna dentant miaivel. Las persunas che n'èn betg vaccinadas, ristgan decurs da la malsogna pli grevs. L'Uffizi da sanadad appellescha en quest senn a l'atgna responsabladad. Ils fatgs da sanadad sco er las collavuraturas ed ils collavuraturs vegnan vinavant engrevgiads fermamain e nunnecessariamain, sche la quota da vaccinaziun na po betg anc vegnir auzada.
Uschè ditg ch'ils dumbers da cas e l'occupaziun da las staziuns intensivas na sa reduceschan betg, recumonda l'Uffizi da sanadad d'observar las mesiras d'igiena e da laschar far immediatamain in test, sch'ins senta sintoms da la malsogna. Il stab da crisa chantunal persequitescha cuntinuadamain il svilup da la pandemia. Per garantir che las instituziuns da sanadad funcziunian, po il chantun prender – en cas d'urgenza – er mesiras regiunalas per limitar las infecziuns.
Ulteriuras infurmaziuns davart l'Emna da vaccinaziun:
www.gr.ch/impfwoche
www.impfwoche.ch
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)
Responsabladad: Uffizi da sanadad