Hedda Samson, ambassadura dal reginavel dals Pajais Bass, Willy De Buck, ambassadur dal reginavel da la Belgia, e Jean-Claude Meyer, ambassadur dal Gronducadi da Luxemburg han visità oz – sin invit da la Regenza – il chantun Grischun.

Il president da la Regenza Mario Cavigelli ed il chancelier Daniel Spadin han beneventà oz en la Chasa grischa a Cuira l’ambassadura dals Pajais Bass, Hedda Samson, l’ambassadur da la Belgia, Willy De Buck, e l’ambassadur dal Luxemburg, Jean-Claude Meyer. L’ambassadura Hedda Samson è vegnida accumpagnada dal consul onurari Koos Vink, l’ambassadur Willy De Buck è vegnì accumpagnà dal consul onurari Bruno Bauer. Suenter il barat dals salids uffizials è in gentar cuminaivel stà sin il program.

La Regenza grischuna tgira annualmain contacts cun represchentantas e represchentants da stadis esters en Svizra. Ils discurs èn elements impurtants da las relaziuns externas dal chantun. Cun ils stadis vischins e cun ils pajais che han relaziuns spezialas cun la Svizra e cun il Grischun vegnan discutadas savens dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia agiuntada:

da sanestra a dretga: Il president da la Regenza Mario Cavigelli, il consul onurari Bruno Bauer, l’ambassadur Jean-Claude Meyer, l’ambassadur Willy De Buck, l’ambassadura Hedda Samson, il consul onurari Koos Vink ed il chancelier Daniel Spadin

Infurmaziuns:

president da la Regenza dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e‑mail Mario.Cavigelli@diem.gr.ch

Responsabladad: Regenza