L'Agid a victimas dal Grischun ha cusseglià l'onn 2020 tut en tut 714 victimas da violenza e persunas pertutgadas da mesiras repressivas per motivs da provediment. Cun 358 annunzias è vegnì registrà in maximum da novas registraziuns.
Al Post da cussegliaziun per l'agid a victimas pon sa drizzar persunas ch'èn vegnidas violadas en lur integritad corporala, sexuala u psichica. I n'emporta betg, cura che quest abus ha gì lieu – per part è quai stà avant blers decennis. Er n'èsi betg necessari d'avair inoltrà ina denunzia penala per vegnir cusseglià da l'Agid a victimas. Il Post da cussegliaziun per l'agid a victimas mussa a las persunas pertutgadas lur dretgs e lur pussaivladads ed intermediescha, sche necessari, ulteriurs agids.
Maximum da novas registraziuns
L'onn passà èn sa drizzadas 358 persunas al Post da cussegliaziun per l'agid a victimas, uschè bleras sco anc mai ils ultims 10 onns. Perquai che la pli gronda part dals cas da mesiras repressivas per motivs da provediment ha pudì vegnir terminada la fin da l'onn 2019, n'è il maximum da 763 cussegliaziuns activas da l'onn precedent betg vegnì surpassà.
GRAFICA 1: Svilup dal dumber da novas registraziuns
En cumparegliaziun cun l'onn precedent èn 115 persunas damain vegnidas cussegliadas en connex cun las mesiras repressivas per motivs da provediment. Dapli che 95 pertschient da questas persunas han survegnì da la Confederaziun ina contribuziun da solidaritad e lur dossier ha pudì vegnir terminà. Dumondas pon dentant anc adina vegnir inoltradas. Da las 714 cussegliaziuns en il Post da cussegliaziun per l'agid a victimas vegnan actualmain 22 persunas cussegliadas en connex cun mesiras repressivas per motivs da provediment.
Ulteriuras 692 persunas pertutgadas da violenza han chattà sustegn en las cussegliaziuns da l'Agid a victimas dal Grischun. Stgars 47 pertschient da quels èn d'attribuir al champ da violenza a chasa (323 persunas). En cumparegliaziun cun l'onn precedent è il dumber da questas cussegliaziuns sa reducì per 9,5 pertschient.
GRAFICA 2: Dumber da cussegliaziuns da l'Agid a victimas dal Grischun 2020
Blessuras corporalas sco malfatg il pli frequent
Tar in grond dumber da persunas ch'èn pertutgadas da violenza èn avant maun plirs causals penals dal dretg davart l'agid a victimas. 45 pertschient eran victimas d'in act da violenza u da blessuras corporalas, 30 pertschient èn stadas pertutgadas d'extorsiun, da smanatscha u da constricziun. 28 pertschient da las victimas han subì violenza sexuala, quai correspunda a 194 persunas, 87 da quellas èn vegnidas violadas en lur integritad sexuala en la vegliadetgna d'uffant. 323 victimas (47 %) èn stadas pertutgadas da violenza a chasa tras lur partenari (65 %) respectivamain tras lur partenaria (7 %) u tras in auter commember da la famiglia (28 %). L'intermediaziun d'in alloschi da protecziun u d'urgenza è restada cun 19 cas sin il nivel dals onns precedents. 10 pertschient da las victimas cussegliadas èn vegnidas blessadas en il traffic sin via.
GRAFICA 3: Malfatgs da las cussegliaziuns currentas 2020
Consequenzas da la pandemia dal coronavirus sin l'Agid a victimas dal Grischun
Malgrà las grondas restricziuns tras las diversas mesiras da protecziun durant la pandemia dal coronavirus è l'Agid a victimas dal Grischun stà cuntanschibel da tut temp per telefon ed al lieu per persunas pertutgadas. La buna colliaziun cun las partenarias ed ils partenaris ha facilità durant la pandemia da chattar las soluziuns las meglras pussaivlas per persunas pertutgadas da violenza.
Infurmaziuns:
Susanna Gadient, manadra da l'Uffizi dal servetsch social, tel. +41 81 257 26 51, e-mail Susanna.Gadient@soa.gr.ch
Responsabladad: Uffizi dal servetsch social