Ier, ils 11 da november 2021, han 67 dunnas giuvnas debattà en la sala dal Cussegl grond davart temas actuals. Ellas han deliberà petiziuns davart la midada dal clima, davart gender e sexissem, davart la furmaziun e la digitalisaziun sco er davart l'avegnir en il Grischun ed han surdà questas petiziuns al president da la Regenza Mario Cavigelli. Cun lur engaschament han ellas impressiunà er las «vairas» parlamentarias ed ils «vairs» parlamentaris che las han accumpagnadas durant il di.

Ils emprims pass sin il parchet politic èn reussids: Las 67 parlamentarias giuvnas dal 4. Parlament da mattas dal Grischun han debattà ier da maniera constructiva, cumpetenta ed engaschada en la sala dal Cussegl grond. Sut la direcziun da la presidenta dal Cussegl grond Aita Zanetti han ellas defendì, crititgà e deliberà lur propostas ch'ellas avevan sviluppà ordavant en set cumissiuns. In tema da gronda calamita è stà gender e sexissem. En duas cumissiuns han tut en tut 26 mattas elavurà propostas davart quest tema. Tranter las participantas eran 14 mattas dals «Valli», la part italofona dal Grischun. Lur votums èn vegnids translatads simultanamain durant la debatta. 19 mattas han elavurà propostas davart il tema «Avegnir en il Grischun», 18 autras davart la midada dal clima. 6 mattas èn s'approfundadas en «Furmaziun e digitalisaziun», in tema impurtant per ils giuvenils. Las 15 menturas e menturs che han accumpagnà las mattas en las cumissiuns, èn stads impressiunads da la qualitad da la debatta e da l'engaschament da las mattas. La deputada Carmelia Maissen ha punctuà: «Qua crescha ina generaziun da dunnas giuvnas che s'engaschan cun segirezza, cun datschertadad e cun cor en la politica – igl è in plaschair da vesair quai.»

Svegliar la quaida per la lavur politica
Tut en tut han las scolaras da la 1. fin 3. classa dal stgalim superiur da tut il Grischun deliberà sis propostas. Quatter mattas han surdà quellas en furma da quatter petiziuns tematicas al president da la Regenza Mario Cavigelli per mauns da la Regenza e dal Cussegl grond. «Jau sper che l'experientscha dad oz as fetschia quaidas dad esser activas en la politica er en l'avegnir», ha Cavigelli motivà las dunnas giuvnas. Che las dunnas èn – anc adina – sutrepreschentadas en la politica, na saja nagin secret. «La democrazia daventa meglra, sche vus gidais a concepir ella – oz e speranza er en l'avegnir», ha il president da la Regenza ditg per finir.

Las sis petiziuns dal 4. Parlament da mattas dal Grischun èn:

• Co daventa mia chasa da scola neutrala al clima?
• Per in traffic public attractiv ed ecologic
  
• Scleriment 2.0
• Per vestgadira da scola che respecta la libertad d'expressiun da las mattas
  
• Maletgs erotics nungiavischads e grooming
  
• Lavur mobila en tut il chantun Grischun

Sco menturas e menturs han cooperà: Aita Zanetti (presidi), Aixa Andreetta, Thomas Bigliel, Jeanette Bürgi-Büchel, Géraldine Danuser, Patrik Degiacomi, Alessandro Della Vedova, Valérie Favre Accola, Christian Kasper, Carmelia Maissen, Anita Mazzetta, Julia Müller, Andri Perl, Renate Rutishauser, Vera Stiffler, Sandra Adank.

Las petiziuns ed ulteriuras infurmaziuns pon vegnir consultadas sut www.stagl.gr.ch/parlament.

Fotografia agiuntada:

Foto 2 Foto 3 Foto 4 Foto 5 Foto 6

©Yanik Bürkli

Infurmaziuns:

Responsabladad: Post da stab per l'egualitad da las schanzas