Il Grischun metta in accent cunter la violenza a chasa. Dals 25 da november fin ils 10 da december 2021 realisescha il chantun – ensemen cun differentas organisaziuns – occurrenzas ed acziuns per render attent a questas violaziuns quotidianas dals dretgs umans. Per impedir e per cumbatter cun success cunter la violenza a chasa dovri in engaschament cuminaivel da tuttas e da tuts.Ils dis d'acziun da quest onn mettan in focus spezial sin il tema «violenza sexuala». 

La violenza a chasa ha bleras fassettas e n'enconuscha nagins cunfins, ni en reguard geografic e cultural ni areguard ils conturns socials, las furmas e la dimensiun. Cumpigliadas èn tut las acziuns da violenza corporala, sexuala, psichica u economica che capitan en la famiglia, en la chasada ubain tranter conjugalas e conjugals respectivamain partenarias e partenaris anteriurs u actuals. Independentamain dal fatg, sche la persuna violenta ha u aveva il medem domicil sco la victima. Las consequenzas per las persunas pertutgadas e per la societad èn multifaras e gravantas. La violenza a chasa è chastiabla e vegn persequitada d'uffizi. Ils dis d'acziun da quest onn sa deditgeschan cunzunt al tema «violenza sexuala».

Avrir ils egls, registrar indizis, intermediar agid
Violenza a chasa e violenza sexuala capitan savens en il zuppà. Il lieu dal malfatg è l'agen dachasa, in lieu che duess normalmain dar segirezza e privadientscha. Cun il slogan «AVRA ILS EGLS! – Cuminaivlamain cunter violenza a chasa» duain la publicitad e persunas spezialisadas vegnir sensibilisadas d'avrir ils egls, da registrar indizis e d'intermediar agid. Per impedir e per cumbatter cun success cunter la violenza a chasa sco er per proteger las persunas pertutgadas dovri in engaschament cuminaivel da tuttas e da tuts. En il Grischun collavuran stretgamain ed en moda interdisciplinara tut ils posts involvids. Il Post da coordinaziun chantunal Violenza a chasa s'engascha per questa collavuraziun professiunala e coordinescha ils dis d'acziun. Las purschidas da cussegliaziun e da sustegn en il Grischun vegnan rendidas enconuschentas per facilitar a las persunas pertutgadas in access simpel ad ellas e per encuraschar las persunas pertutgadas da tschertgar agid e sustegn.

Program dals dis d'acziun
Ils dis d'acziun cumenzan cun il Di internaziunal cunter violenza envers dunnas. Ils 25 da november 2021 vegnan illuminads cun glisch oranscha plirs edifizis en tut il chantun per render visiblas simbolicamain questas furmas da violenza. Fin ils 10 da december 2021, il Di internaziunal dals dretgs umans, vegn realisà en il Grischun in program varià tranter auter cun exposiziuns, cun concerts, cun acziuns da stan, cun preschentaziuns da film, cun occurrenzas da podium e cun referats.

Agiunta:

Flyer dal program dals dis d'acziun 2021

Infurmaziuns:

• Susanna Gadient, manadra da l'Uffizi dal servetsch social, tel. +41 81 257 26 51, e‑mail Susanna.Gadient@soa.gr.ch
• Sarah Huder, manadra dal Post da coordinaziun Violenza a chasa, tel. +41 81 257 26 11, e‑mail Sarah.Huder@soa.gr.ch

Responsabladad: Uffizi dal servetsch social