La Regenza ha approvà las revisiuns parzialas da la planisaziun locala, concludidas da la vischnanca da Flem ils 13 da zercladur 2021 e da la vischnanca da Laax ils 27 da mars 2021. Cun questas revisiuns da la planisaziun locala duain vegnir stgaffidas las premissas per realisar ina pendiculara nuninterrutta sin l'axa Flem – Foppa – Startgels – Segnas – Nagens Sura / Ils Cugns.
Quest stabiliment planisà en il territori da recreaziun intensiva «Arena Alva» remplazza d'ina vart l'avertura per Cassons (gia l'onn 2018 è la teleferica da Naraus – Cassons vegnida demontada) sco er la sutgera da Foppa – Naraus (sutgera d'apport, che vegn demontada senza cumpensaziun) ed ils anteriurs stabiliments da Flem – Foppa (stabiliment d'apport, che vegn remplazzà sin il trassé existent), da l'autra vart er la teleferica veglia da Startgels – Grauberg (implant da diever, demontascha).

©swisstopo

La Regenza ha garantì ina contribuziun chantunala da var 896 000 francs a l'Associaziun per la chasa d'emprendistas e d'emprendists da l'Engiadin'Ota a Samedan per renovar sco planisà las chombras en il tract da mattas da la chasa.
La chasa d'emprendistas e d'emprendists ch'è vegnida construida l'onn 1968 porscha ina dimora cun alimentaziun a circa 70 giuvenils che absolvan ina furmaziun professiunala. Las surfatschas ed ils interiurs da las chombras dals plauns d'abitar èn per part passa 50 onns vegls e ston vegnir sanads. En il tract da mattas èsi previs da midar duas chombras dublas en quatter chombras singulas sco er d'equipar tut las chombras dublas e singulas cun locals sanitars privats. Ils locals sanitars en ils corridors svaneschan. Ultra da quai vegnan construids en l'avantchombra da las stanzas per mintga emprendista e per mintga emprendist dus elements da stgaffa ch'ins po serrar cun ina clav. Tras la renovaziun da tut las surfatschas sco er tras la montascha da mobiglias funcziunalas en las chombras vegnan purschidas en il futur localitads modernas ed agreablas. Tut en tut resultan en questa emprima etappa 20 chombras novas senza obstachels, 16 da quellas èn chombras singulas e 4 chombras dublas.

©Lehrlingshaus Engiadina

La Regenza ha concedì als Servetschs psichiatrics dal Grischun (SPGR) ina contribuziun da maximalmain 329 000 francs als custs per installar provisoricamain ina staziun da letgs serrada per giuvenils.
Il basegn d'ulteriuras plazzas staziunaras per la psichiatria d'uffants e da giuvenils è cumprovada dapi onns. Perquai ha il cussegl d'administraziun dals SPGR decidì l'onn 2019 da realisar ina nova clinica per la psichiatria d'uffants e da giuvenils al lieu da la clinica Waldhaus. Igl è previs da metter en funcziun l'edifizi nov durant il segund quartal da l'onn 2025.Per reducir ils temps da spetga per ils giuvenils en il sectur staziunar ed er per separar il tractament localmain da las persunas creschidas, duai vegnir realisada ina soluziun intermediara entaifer ils SPGR, fin che l'edifizi nov vegn mess en funcziun. Concretamain è previsa l'installaziun d'ina staziun da tschintg letgs en in setting serrà per giuvenils en la chasa dal persunal da la clinica Waldhaus. Questa staziun vegn ad esser en funcziun previsiblamain mo durant 3 onns e mez. Suenter svanescha ella puspè or da la chasa dal persunal. Ils custs d'investiziun totals per la staziun da letgs provisorica importan 509 000 francs.

©PDGR