L'ovra d'art «Svizra Rumantscha» da Donat Caduff penda dapi oz permanentamain en la Chasa dals chantuns a Berna. L'inauguraziun è il medem mument il culp da partenza per il viadi da l'exposiziun «Rumantsch è…». L'exposiziun vegn mussada a partir dals 12 da schaner 2022 en la chasa municipala a Cuira.

L'ovra d'art «Svizra Rumantscha» mussa la Svizra e sias vischnancas. Per il maletg ha Donat Caduff translatà ils nums da tut las var 2200 vischnancas en rumantsch. Per las bleras vischnancas na devi fin ussa nagina designaziun rumantscha.

Simbol per la diversitad linguistica tras il rumantsch
L'ovra d'art duai regurdar en la Chasa dals chantuns permanentamain a l'impurtanza dal rumantsch per la diversitad linguistica en Svizra. La serigrafia è 160 centimeters lada e 107 centimeters auta ed è in emprest dal chantun Grischun.

L'inauguraziun da l'ovra d'art ha gì lieu en preschientscha dal cusseglier guvernativ Christian Rathgeb, president da la Conferenza da las regenzas chantunalas (CdC), dal cusseglier guvernativ Jon Domenic Parolini, dal secretari general da la CdC Roland Mayer sco er da Donat Caduff. «Jau ma legrel enormamain! Il maletg da Donat Caduff n'è betg mo bel, mabain envida er a reflectar davart la diversitad linguistica e davart l'agen origin. El mussa en moda excellenta che la cultura linguistica rumantscha è ina ierta preziusa da tut la Svizra», ha ditg il cusseglier guvernativ Rathgeb.

L'exposiziun sa ferma a Cuira
L'inauguraziun da l'ovra d'art è il medem mument il culp da partenza per il viadi da l'exposiziun «Rumantsch è…». Suenter var 3 mais en la Chasa dals chantuns vegn l'exposiziun mussada a partir dals 12 da schaner 2022 fin il cumenzament da mars en la chasa municipala a Cuira. Sut www.rumantsch-e.ch chattais Vus las indicaziuns davart ils lieus da l'exposiziun. L'exposiziun po vegnir contemplada là er online.

L'exposiziun ambulanta «Rumantsch è…» sensibilisescha per il rumantsch en las quatter linguas naziunalas, gida a colliar las Rumantschas ed ils Rumantschs ed envida las visitadras ed ils visitaders da sezzas e sezs «semnar lingua».

Fotografias agiuntadas:

da sanestra a dretga: Donat Caduff, Jon Domenic Parolini, Christian Rathgeb und Roland Mayer / Foto: ©Felix Peter

Foto 2 / Foto 3 / Fotos: ©Donat Caduff

Infurmaziuns:

• cusseglier guvernativ dr. Christian Rathgeb, schef dal Departament da finanzas e vischnancas, president da la Conferenza da las regenzas chantunalas, tel. +41 81 257 32 01, e‑mail Christian.Rathgeb@dfg.gr.ch
• Donat Caduff, e‑mail to.donat@gmail.com