La Regenza ha approvà ina revisiun parziala da las Disposiziuns executivas tar la legislaziun da taglia. Uschia vegnan diversas disposiziuns da la Lescha federala davart l'armonisaziun da la taglia transferidas en la legislaziun chantunala da taglia. Ultra da quai ha la Regenza mess en vigur las disposiziuns da la revisiun parziala da la Lescha da taglia per il chantun Grischun dals 20 d'october 2020. Cun quellas era vegnida stgaffida la basa legala per pudair inoltrar en l'avegnir la decleraziun da taglia sin via electronica senza suttascripziun. Perquai che l'Administraziun da taglia dispona da las pussaivladads tecnicas correspundentas, èsi da nov pussaivel da desister da la suttascripziun a partir dal 1. da schaner 2022, sche las decleraziuns da taglia vegnan transmessas electronicamain. Quai vala per las decleraziuns da la taglia sin las entradas e sin la facultad sco er per las decleraziuns da la taglia sin il gudogn e sin il chapital a partir da la perioda fiscala 2021. Empè da la suttascripziun sto vegnir furnida ina conferma electronica che vegn creada cun agid dal pled-clav che vegn consegnà ensemen cun ils documents da la decleraziun da taglia.

La Cumissiun chantunala per la determinaziun da sveltezzas maximalas differenziadas per il traffic sin via (Cumissiun Vmax) cusseglia las autoritads da permissiun respectivas ch'èn responsablas per las limitaziuns da la sveltezza sin tut las vias dal territori chantunal. Ella examinescha tut las limitaziuns da sveltezza ch'èn registradas en la «Directiva chantunala per quietar il traffic entaifer il vitg» (zonas da tempo 30, tempo 30, zonas d'inscunter). La cumissiun sa cumpona da trais commembras e commembers dal chantun (mintgamai ina represchentanza dal Departament da giustia, segirezza e sanadad, da la Polizia chantunala e da l'Uffizi da construcziun bassa) e da mintgamai ina commembra u in commember sco represchentanza da las trais associaziuns da traffic (Automobil Club da la Svizra secziun Grischun, Touring Club Svizra Grischun, Associaziun traffic ed ambient Grischun).

Per differents motivs èsi sa mussà che la cumissiun – ch'è vegnida stgaffida l'onn 1972 – n'è betg pli adequata. Perquai ha la Regenza decidì d'abolir la Cumissiun per la determinaziun da sveltezzas maximalas differenziadas per il traffic sin via per ils 31 da december 2021.

Per simplifitgar e per accelerar ils process survegn da nov la Polizia chantunala – premess che la Regenza na saja betg responsabla – la cumpetenza da disponer limitaziuns da la sveltezza per motivs da segirezza. La Polizia chantunala è gia oz l'autoritad spezialisada cumpetenta e dispona da las enconuschientschas localas necessarias. Il Departament da giustia, segirezza e sanadad è l'emprima instanza da recurs.

Il chantun adattescha il chapitel «Abitadi» dal Plan directiv chantunal e rapporta a la Confederaziun davart il svilup da las zonas da lavur. L'ultim cun il facit che l'occupaziun da las zonas da lavur, en spezial en ils territoris urbans e suburbans, s'augmenta cuntinuadamain. La Regenza ha dà glisch verda a l'adattaziun dal Plan directiv ed ha ussa inoltrà quella a la Confederaziun per l'approvaziun. Cun ina resposta pon ins far quint mez da l'onn 2022.

Questa adattaziun dal Plan directiv chantunal è daventada necessaria, perquai che la Confederaziun aveva approvà l'avrigl 2019 il «Plan directiv Abitadi». En quest connex aveva la Confederaziun formulà ina retscha d'incumbensas ch'èn stadas da realisar entaifer dus onns. Las cumplettaziuns en il «Plan directiv Abitadi» concretiseschan, tenor tge criteris ch'igl è pussaivel d'engrondir ubain da spustar il territori d'abitadi, co ch'il basegn per zonas da lavur vegn eruì e co ch'ils territoris da lavur èn d'avrir areguard il traffic public. Ultra da quai ha la Confederaziun pretendì, ch'il chantun rapportia davart il svilup da las zonas da lavur.

L'exposiziun publica tar questas incumbensas federalas è vegnida fatga en il Grischun tranter il december 2020 ed il favrer 2021. Vischnancas, regiuns, chantuns vischins, associaziuns ed auters han fatg valair lur interess. Sin quai ha il chantun prendì encunter ina retscha da propostas, remartgas e puncts da critica, oravant tut areguard ils criteris per engrondir il spazi d'abitadi. A chaschun da la revisiun dal Plan directiv chantunal èn questas chaussas vegnidas resguardadas.

Cun tschertas cundiziuns ha la Regenza approvà il project per la correcziun da la via da Ravaisch, entaifer il vitg da Ravaisch. La via da Ravaisch, ina via chantunala da colliaziun, sa sparta curt avant Samignun Vitg da la via da Samignun e collia la fracziun da Ravaisch. En il stretg center dal vitg è la via fitg stretga, uschia ch'ils bus locals e da skis pon passar mo cun fadia. Ultra da quai ha la cuvrida da la via numerus donns. Tras la correcziun da la via èsi planisà da schlargiar la via e da renovar la cuvrida. Sin giavisch da la vischnanca da Samignun vegn ultra da quai er optimà in mir da sustegn communal en il rom da quest project da via.

Ils custs totals dal project d'exposiziun importan circa 1,04 milliuns francs. La vischnanca da Samignun surpiglia ils custs per optimar il mir da sustegn. Ils custs per il chantun importan pia 989 000 francs.

 

Cun intginas cundiziuns e permissiuns ha la Regenza approvà il project per la construcziun da rempars en la Val d'Acletta da la vischnanca da Mustér. L'october 2020 ha in ferm urizi chaschunà aua gronda en la Val d'Acletta. Qua tras èn parts dals rempars da l'aual vegnidas donnegiadas. Per pudair garantir la protecziun cunter aua gronda er en l'avegnir ha la vischnanca da Mustér decidì, da restaurar ils objects da construcziun donnegiads.

Als custs totals da var 1,73 milliuns francs sa participeschan il chantun e la Confederaziun tenor la cunvegna da program da la NGF (nova gulivaziun da finanzas) en il sectur «ovras da protecziun cunter l'aua». La contribuziun chantunala tenor la Lescha davart la correcziun dals curs d'aua importa 346 000 francs. Il project per la correcziun da l'aual protegia er la via sursilvana, la via dal Lucmagn sco er la via d'Acletta. Perquai paja il chantun supplementarmain ina contribuziun da la construcziun da vias da 155 700 francs.

 

La Regenza ha mess en vigur la revisiun parziala da la Lescha davart l'execuziun giudiziala en il chantun Grischun (Lescha davart l'execuziun giudiziala) per il 1. da schaner 2022. Ultra da quai ha ella approvà la revisiun totala da l'Ordinaziun tar la Lescha davart l'execuziun giudiziala (Ordinaziun davart l'execuziun giudiziala) ed ha relaschà l'Ordinaziun davart las instituziuns d'execuziun.

Cun las midadas vegn la Lescha davart l'execuziun giudiziala adattada al dretg federal. Plinavant vegnan resguardads ils svilups en la pratica da l'execuziun giudiziala.