L'augment rasant dals dumbers da cas pervia da la varianta Omicron engrevgescha fermamain las capacitads limitadas dals labors, cun la consequenza che las chadainas d'infecziun na pon betg pli vegnir interruttas a temp util. La derasaziun da las infecziuns na sa lascha betg pli franar uschia. Perquai ha la Regenza decidì da focussar ils tests repetitivs ad interim sin las instituziuns da sanadad e da tgira, sin las scolinas sco er sin las 1. e 2. classas primaras. Per quest motiv vegnan ils tests repetitivs en ils manaschis ed en las scolas sistids a partir da mardi, ils 11 da schaner 2022, a las 12.00.

La varianta Omicron dal coronavirus sa derasa en moda rasanta. Cun in interval da trais dis davent da l'infecziun fin al cumenzament da la malsogna (temp d'incubaziun) è Omicron bler pli contagiusa che la varianta precedenta Delta. Gia oz èn var 95 pertschient da las infecziuns da COVID-19 d'attribuir ad Omicron. La rata da positivitad importa 6,7 pertschient tar ils tests en ils manaschis ed 1 pertschient tar ils tests en las scolas. Var 5 pertschient da la populaziun grischuna èn actualmain en quarantina u en isolaziun. La derasaziun da las infecziuns en la populaziun è pia progredida fermamain. Anc adina protegia la vaccinaziun dentant fitg bain cunter grevs decurs da la malsogna.

Omicron influenzescha fundamentalmain la strategia da test
Sch'il dumber da provas positivas dals tests dals pools s'augmenta, crescha er il basegn da tests posteriurs. Perquai che las capacitads dals labors èn limitadas, ston ins spetgar passa 48 uras sin l'evaluaziun dals resultats dals tests. Sch'i n'è betg pussaivel da reducir considerablamain il temp davent da la consegna dals tests fin al resultat definitiv e fin a l'isolaziun correspundenta, perdan ils tests repetitivs lur intent oriund. Las chadainas d'infecziun na pon betg pli vegnir interruttas efficaziamain.

Tras l'ulteriura derasaziun dad Omicron ston ins quintar las proximas emnas cun in augment da persunas sintomaticas, cun la consequenza che las capacitads dals labors vegnan surchargiadas.

Ina priorisaziun dals secturs da test è indispensabla
Sin fundament da quest svilup ha la Regenza decidì da focussar ils tests repetitivs sin las instituziuns da sanadad e da tgira, sin las scolinas sco er sin las 1. e 2. classas primaras. Quai correspunda a la recumandaziun da priorisaziun da l'Uffizi federal da sanadad publica. En cas da stretgas tar ils tests recumonda l'uffizi federal numnadamain da restrenscher ils tests en emprima lingia sin persunas cun sintoms e sin lur persunas da contact cun sintoms.

Ils tests repetitivs vegnan cuntinuads en ils suandants secturs:

• ospitals, clinicas, purschidas da la tgira ed assistenza staziunara da pazientas e pazients da lunga durada e da persunas attempadas, servetschs da la tgira ed assistenza a chasa (Spitex), praticas da medis, praticas da dentists, praticas da fisioterapia, apotecas, chasas da dimora per persunas cun impediments, chasas da dimora per uffants e per giuvenils, canortas d'uffants e stabiliments giudizials. Exceptadas da quai èn las chasas da dimora en il sectur da la furmaziun fundamentala professiunala, da las scolas medias sco er dal stgalim terziar.
• scolinas sco er 1. e 2. classas primaras.

Il program chantunal da tests en ils manaschis ed en las scolas vegn sistì ad interim a partir da mardi, ils 11 da schaner 2022, a las 12.00. La fin da schaner 2022 giuditgescha la Regenza danovamain la situaziun.

Certificats urgentamain necessaris sin basa da tests vegnan purschids er vinavant tar ils posts da test existents. Tgi che ha sintoms vegn supplitgà da restar a chasa e d'evitar contacts, fin ch'ils sintoms èn svanids u durant almain tschintg dis.

Sa laschar vaccinar, tegnair distanza e purtar ina mascrina èn las mesiras da protecziun las pli efficazias
L'Uffizi da sanadad appellescha urgentamain d'observar consequentamain las mesiras da protecziun vertentas per pudair garantir il provediment da la sanadad. En spezial valan illimitadamain las suandantas mesiras: sa laschar vaccinar, tegnair distanza, purtar ina mascrina, lavar fitg bain ils mauns, dar regularmain aria a locals interns. Gist uschè impurtant èsi d'evitar contacts e da sa cuntegnair cun respect a chaschun d'activitads da temp liber ed en il ravugl da la famiglia sco er d'amias ed amis. Mo sche tut las mesiras vertentas actualas vegnan observadas e realisadas consequentamain, èsi pussaivel d'impedir ulteriuras mesiras pli rigurusas durant ils proxims dis e durant las proximas emnas. Quai pretenda ina gronda disciplina da la populaziun e dals giasts.

Vasta strategia da test per dumagnar la pandemia dal coronavirus
Als tests regulars en las scolas sa participavan 157 instituziuns cun var 20 000 scolaras e scolars sco er persunas d'instrucziun. Ils tests emnils en las scolas èn stads fin ussa in instrument efficazi e betg restrictiv per identifitgar ed isolar svelt scolaras e scolars asintomatics da las vegliadetgnas che n'èn per gronda part anc betg vaccinadas. Quests tests han gidà ad impedir erupziuns dal coronavirus ed a cuntinuar cun il manaschi da scola.

L'obligatori da mascrinas – che vala gia per tut las persunas davent da la 3. classa primara fin e cun il stgalim secundar II (scolas professiunalas spezialisadas, centers da curs intermanaschials, lavuratoris d'emprendissadi, purschidas transitoricas, scolas medias sco er manaschis d'abitar e d'alimentaziun) ed al gimnasi inferiur – resta vinavant en vigur.

Als tests repetitivs en ils manaschis sa participavan actualmain circa 4243 interpresas cun var 66 022 collavuraturas e collavuraturs. Il december 2021 vegnivan fatgs var 30 000 tests per emna. Ils tests voluntars en ils manaschis eran in instrument efficazi per testar ina part impurtanta da la populaziun mobila asintomatica e per interrumper las chadainas d'infecziun uschè baud sco pussaivel. Tras la strategia «Tests empè da quarantina» han persunas, che han gì contact cun persunas cun in test positiv, gì la pussaivladad dad ir vinavant a lavurar grazia als tests repetitivs en ils manaschis. Uschia èsi stà pussaivel da reducir il donn finanzial per l'economia pervia da persunal absent.

Infurmaziuns:

Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)

Responsabladad: Regenza