Il program annual da la Regenza cuntegna tut en tut 98 finamiras e terms impurtants che duain vegnir cuntanschids quest onn. Ils puncts centrals dal program annual da quest onn èn il traffic public, il sectur da sanadad, la meglieraziun da l'attractivitad dal chantun sco patrun, il management chantunal da smanatschas, la construcziun d'in nov Center da scola auta sco er l'attractivitad dal chantun sco lieu da viver, da lavurar e per famiglias.

Il program da la Regenza ed il plan da finanzas èn – tenor la Constituziun chantunala – ils instruments centrals da la gestiun strategica e politica dal chantun Grischun. Ensemen furman els la planisaziun da prioritads da la Regenza a vista mesauna. Il program da la Regenza 2021–2024 sa focussescha sin ils puncts centrals «Digitalisaziun ed innovaziun», «Green Deal» sco er «Chantun da muntogna multifar». Ils puncts centrals da svilup cuntegnids en quel vegnan mintgamai concretisads e realisads en ils programs annuals. Il program annual 2022 qua avant maun cuntegna tut en tut 98 finamiras da l'onn ed è vegnì tractà en la sessiun da december dal Cussegl grond en il rom da la missiva tar il budget. Ils sis pli impurtants puncts centrals da la planisaziun annuala 2022 èn:

Augment da l'attractivitad en il focus
La Regenza sa stenta da meglierar cuntinuadamain l'attractivitad da l'administraziun chantunala sco patruna. Tras la revisiun da la Lescha dal persunal respectivamain tras l'entrada en vigur da la Lescha davart la Cassa da pensiun dal Grischun duain las cundiziuns per las collavuraturas ed ils collavuraturs da l'administraziun chantunala vegnir meglieradas considerablamain ed adattadas a las pretensiuns d'ozendi ed als standards confurms al martgà. Plinavant èsi er previs d'augmentar cuntinuadamain l'attractivitad en il sectur dal traffic public. Per la fin da l'onn 2025 duai vegnir introducì in tact da mes'ura integral per ils trens Intercity tranter Turitg e Cuira. Il tact da mes'ura vegn implementà pass per pass. In emprim pass vegn realisà l'onn 2022. Cun la Strategia chantunala concernent la forza idraulica, che vegn tractada il favrer 2022 en il Cussegl grond, duai la finala vegnir augmentada la creaziun da valurs ch'èn cumbinadas cun la producziun d'electricitad ord forza idraulica en il chantun Grischun ed uschia vegnir cuntanschids retgavs persistents.

Augmentar las schanzas da furmaziun e cumbatter la mancanza da persunas spezialisadas
En il sectur da furmaziun duain – cunzunt cun la construcziun dal nov Center da scola auta modern – vegnir meglieradas l'attractivitad sco er l'attracziun naziunala ed internaziunala da la Scola auta spezialisada dal Grischun (SASGR). L'onn 2022 vegn elavurada la missiva correspundenta e vegn sviluppà vinavant il project da construcziun.
Per augmentar l'attractivitad dal chantun sco lieu da viver, da lavurar e per famiglias vul la Regenza meglierar la cumpatibilitad da la famiglia cun la professiun e commerzialisar il Grischun sco spazi da lavurar e da viver. Quai succeda p.ex. tras la realisaziun da mesiras en il sectur da la promoziun d'uffants e da giuvenils, tras il rinforzament da la tgira d'uffants cumplementara a la famiglia u cun s'adressar sistematicamain a persunas spezialisadas.

Reavertura da projects relevants per la sanadad
L'onn 2021 han ins stuì sistir e suspender bleras da las activitads planisadas e blers projects planisads en il sectur da sanadad pervia da la pandemia da Covid-19. Da menziunar è en quest connex per exempel il project «Distgargia da persunas che tgiran lur confamigliars tras purschidas da sustegn». Las lavurs correspundentas duain vegnir reprendidas respectivamain cuntinuadas l'onn 2022.
In ulteriur term furma il management chantunal da smanatschas central planisà. L'onn current vegn elavurà in concept en chaussa. Il concept duai cuntegnair in'analisa da la situaziun actuala sco er ina cumparegliaziun chantunala che permettan da fixar eventualas opziuns d'agir. Tranter auter duain vegnir definidas las cumpetenzas dal management da smanatschas. En quest rom vegni sclerì, tge instituziun e tge persuna che sto surpigliar la gestiun tar tge situaziun da smanatscha respectivamain che sto decider davart las mesiras che ston vegnir prendidas.

Agiunta:

Program annual 2022

Infurmaziuns:

president da la Regenza Marcus Caduff, schef dal Departament d'economia publica e fatgs socials, tel +41 81 257 23 01 (cuntanschibel per telefon tranter las 14.00 e las 15.00), e‑mail Marcus.Caduff@dvs.gr.ch

 

Responsabladad: Regenza