La Regenza ha concludì che tut las persunas ch'èn domiciliadas en il chantun Grischun e che han in diplom da tgirunza u tgirunz, ma che na lavuran actualmain betg en lur professiun emprendida, èn obligadas da s'annunziar. Per quest intent stat a disposiziun in formular sin www.gr.ch/covid-personal.
Ins sto far quint ch'il ferm augment da cas da corona vegnia a manar il provediment medicinal – respectivamain las resursas da persunal en las professiuns da tgira – a lur cunfins. Per garantir il provediment medicinal vegnan persunas da las suandantas professiuns obligadas da sa registrar immediatamain per in eventual engaschament posteriur, sch'ellas abitan en il chantun Grischun, na lavuran betg en lur professiun emprendida e na fan betg part d'ina gruppa da ristga:
- spezialista/spezialist da sanadad
- attest da qualificaziun en la tgira pratica da persunas malsaunas da la Crusch Cotschna Svizra
- tgirunza diplomada/tgirunz diplomà ND I
- diplom: tgirunza/tgirunz TGM/TCM/UPP/TPsi (tgira generala/tgira communala/tgira d'uffants, pagliolancas e pops/tgira psichiatrica)
- tgirunza/tgirunz da sanadad e da tgira da malsauns ND II
- tgirunza diplomada/tgirunz diplomà SSS
- PHD Nursing Science
- Master of Science in Nursing (MSN)
- Master of Science en tgira (MScN) SAS
- tgirunza/tgirunz SAS (Bachelor of Science in Nursing [BScN])
Tenor la Lescha da sanadad dal chantun po il chantun obligar manaschis sco er persunas spezialisadas dal sectur da sanadad da cooperar tar la prevenziun e tar il cumbat cunter malsognas transmissiblas da l'uman. En vista a la situaziun precara actuala vegni ad esser inevitabel che instituziuns da sanadad e da tgira vegnan a stuair dumagnar stretgas tar il persunal. La Regenza engrazia grondamain al persunal spezialisà per la tgira.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)
Responsabladad: Regenza