Duas vischnancas ed ina regiun èn s'annunziadas per organisar la sessiun extra muros 2023 dal Cussegl grond. La Conferenza da las presidentas e dals presidents ha ussa decidì d'examinar pli detagliadamain la candidatura da Claustra.

Per organisar la sessiun extra muros 2023 dal Cussegl grond han candidà las vischnancas da Claustra e da Val S. Pieder sco er la regiun Moesa. Durant sia ultima sesida ha la Conferenza da las presidentas e dals presidents dal Cussegl grond (CP) examinà las candidaturas. Perquai che la CP ha l'incumbensa da rapportar e da far ina proposta al Cussegl grond, ha ella stuì sa decider da persequitar vinavant ina candidatura. Pervia dals trais buns dossiers da candidatura n'èsi betg stà simpel da far ina tscherna. La finala è la decisiun vegnida tratga a favur da la vischnanca da Claustra. Il presidi ed il Secretariat dal Cussegl grond vegnan ussa ad examinar pli detagliadamain la candidatura da la vischnanca da Claustra per pudair elavurar la basa per il rapport e per la proposta al Cussegl grond.

Il Cussegl grond vegn previsiblamain a decider durant la sessiun d'avrigl 2022 davart la surdada da l'organisaziun da la sessiun extra muros 2023.

Infurmaziuns:

Presidenta dal Cussegl grond Aita Zanetti, tel. +41 79 314 28 72 (cuntanschibel per telefon a partir da las 14.00)

Responsabladad: Chanzlia chantunala / Secretariat dal Cussegl grond