L'installaziun e l'ulteriur svilup da la politica chantunala d'uffants e da giuvenils èn sin fitg buna via. Cun rinforzar la politica chantunala d'uffants e da giuvenils vul la Regenza stgaffir cundiziuns da viver attractivas per famiglias, per uffants e per giuvenils. Gia èn dus terzs da la durada dal program absolvids. En la realisaziun sa mussi ch'igl exista in basegn d'agir sin plaun da la legislaziun.

En il program da la politica d'uffants e da giuvenils èn vegnids analisads l'onn 2020 – sin basa d'ina cunvegna cun la Confederaziun – il stadi ed il basegn en ils secturs da la promoziun, da la protecziun e da la participaziun. Sin basa da las analisas è resultà – tras ina collavuraziun interdepartamentala – in catalog da mesiras per ils onns 2020 fin 2022.

Stadi intermediar: pass da lavur actuals sin basa dal model directiv da la politica d'uffants e da giuvenils
Las mesiras cumpiglian lavurs concepziunalas strategicas, il «PAT» gia inizià, in project da pilot per agids temprivs en il sectur da la «promoziun tempriva», optimaziuns en il sectur da la protecziun d'uffants, ma er il sustegn d'ideas da project innovativas en ils differents champs tematics da la politica d'uffants e da giuvenils. Plinavant èn garantids tras il program da la politica d'uffants e da giuvenils la purschida da prevenziun «L'egliada sin l'uffant» per geniturs cun grondas dispitas en fasas da separaziun, il sustegn dal process dad UNICEF «Vischnanca che tegna quint dals basegns dals uffants» e lavuratoris per scolas dal stgalim secundar I e II areguard il sistem electoral grischun per la primavaira 2022.

Terminà è – ultra da l'analisa dal stadi e dal basegn – er il process strategic «Child-friendly Justice». Plinavant è vegnì deliberà il model directiv da la politica d'uffants e da giuvenils. La primavaira 2021 ha uschia pudì vegnir realisada ina da las mesiras essenzialas. Il model directiv porscha in rom d'orientaziun a las persunas spezialisadas involvidas per concepir la strategia per la promoziun tempriva, a las recumandaziuns da la Conferenza per la protecziun d'uffants e da creschids ed a la Conferenza da las directuras e dals directurs chantunals dals affars socials per collocar uffants e giuvenils ordaifer la famiglia u a las pussaivladads per cussegliar en moda simpla uffants e giuvenils en il Grischun. Il model directiv promova in proceder structurà e consistent en quest champ d'incumbensas interdepartamental.

In sguard enavant: basegn d'agir sin plaun da la legislaziun
Per in ulteriur svilup persistent ed a lunga vista da la politica chantunala d'uffants e da giuvenils arrivan ins als cunfins cun las basas giuridicas existentas, en spezial cun la Lescha davart ils uffants confidads da l'onn 2007. Per concepir ina politica d'uffants e da giuvenils cumplessiva ha il Departament d'economia publica e fatgs socials l'intenziun da far ina revisiun totala da la Lescha davart ils uffants confidads, respectivamain da stgaffir ina nova basa giuridica per la politica d'uffants e da giuvenils en il Grischun. Ord la perspectiva finanziala pussibilitescha la revisiun ina gestiun adequata cun cleras finamiras e pia in meglierament da la purschida per uffants e giuvenils. Investiziuns a lunga vista dal maun public a favur da mesiras per uffants e giuvenils sa pajan a lunga vista, sco quai che per exempel ils studis davart l'uffanza tempriva cumprovan gia.

Il svilup d'ina basa giuridica moderna per la politica d'uffants e da giuvenils cun ils trais champs d'acziun da la promoziun, da la protecziun e da la participaziun vegn cumenzada en il program da la Regenza 2021–2024 cun il punct central da svilup 4.3 «Promoziun da structuras favuraivlas per famiglias». Uschia vegni garantì che la buna via per sviluppar ina politica d'uffants e da giuvenils en il Grischun po vegnir cuntinuada sin plaun interdepartamental ed en collavuraziun cun las vischnancas sco er cun acturas ed acturs privats pli ditg che l'onn 2022.

Agiuntas:

model directiv per la politica d'uffants e da giuvenils en il chantun Grischun

mesiras en il rom dal program «Politica d'uffants e da giuvenils en il chantun Grischun»

Infurmaziuns:

president da la Regenza Marcus Caduff, schef dal Departament d'economia publica e fatgs socials, tel +41 81 257 23 01 (cuntanschibel per telefon tranter las 11.00 e las 12.00), e‑mail Marcus.Caduff@dvs.gr.ch

 

Responsabladad: Departament d'economia publica e fatgs socials