Las interpresas grischunas che pateschan fitg da las consequenzas da la pandemia da COVID-19 han pudì dumandar sustegn finanzial en furma d'agids per cas da direzza fin la fin da zercladur 2021. Ussa prepara il chantun Grischun novs agids per cas da direzza per il quart quartal da l'onn 2021 e per ulteriurs mais da l'onn 2022.
La Regenza vuless sustegnair interpresas ch'èn spezialmain pertutgadas da la pandemia da COVID-19 er per las perditas da la svieuta ch'ellas han gì durant il quart quartal da l'onn 2021. Quest conclus vala sco decidì cun la resalva che la Cumissiun da gestiun dal Cussegl grond (CdG) approveschia ils credits correspundents. Ultra da quai duain vegnir instradadas – en il rom da las prescripziuns dal dretg federal concludidas – novas mesiras per cas da direzza per l'onn 2022.
Reavertura dal Program per cas da direzza 1
Per il sustegn durant il quart quartal da l'onn 2021 duai vegnir reavert il Program per cas da direzza 1. Valair valan las medemas reglas sco l'onn passà. Da princip vul quai dir, ch'interpresas cun sedia en il Grischun pon inoltrar ina dumonda, sch'ellas èn vegnidas fundadas avant il 1. d'october 2020 e sch'ellas èn stadas serradas uffizialmain almain 40 dis durant la perioda dal 1. da november 2020 ed ils 30 da zercladur 2021. Las interpresas che n'èn betg stadas serradas uffizialmain pon mo lura inoltrar ina dumonda, sch'ellas han fatg ina perdita da la svieuta d'almain 40 pertschient durant l'onn 2020 resp. durant ina perioda da 12 mais tranter il schaner 2020 ed il zercladur 2021.
Agids pervi da perditas da la svieuta durant il quart quartal da l'onn 2021 vegnan mo concedids, sche questas perditas importan almain 15 pertschient.
Il Departament d'economia publica e fatgs socials (DES) è londervi da preparar ils formulars da dumonda ed ils factsheets necessaris, uschia che las dumondas pon vegnir inoltradas bainbaud. Ils credits posteriurs necessaris vegnan suttamess uschè svelt sco pussaivel a la CdG.
Preparaziun dal nov Program per cas da direzza 2
Per agids a favur da las interpresas ch'èn pertutgadas spezialmain da la pandemia da COVID-19 durant ils emprims mais da l'onn 2022 ha la Confederaziun elavurà novas basas giuridicas. Quellas èn entradas en vigur ils 8 da favrer 2022. Il chantun è londervi da stgaffir las premissas e las basas necessarias per realisar il nov Program per cas da direzza 2.
Ulteriuras infurmaziuns chattais Vus sin la pagina d'internet dal DES.
Infurmaziuns:
President da la Regenza Marcus Caduff, schef dal Departament d'economia publica e fatgs socials, tel +41 81 257 23 01, e-mail Marcus.Caduff@dvs.gr.ch (cuntanschibel da las 10.30 fin las 12.00)
Responsabladad: Regenza