Sut la devisa «Rumantsch: in ferm toc Svizra» ha il Departament federal d'affars exteriurs (DFAE) lantschà l'onn passà l'emprima emna internaziunala da la lingua rumantscha. L'emna proxima cumenza la segunda ediziun da la «Emna rumantscha».

Suenter avair realisà per l'emprima giada la «Emna rumantscha» l'onn passà, è ella ussa mintgamai il favrer in punct fix en il chalender. L'occurrenza annuala ha la finamira da render attent a la situaziun da la quarta lingua naziunala sco er da suttastritgar l'impurtanza da la plurilinguitad per la coesiun naziunala.

Dal Grischun, a Berna e sin l'entir mund
Quest onn vegn l'emna internaziunala da la lingua rumantscha lantschada da scolaras e scolars da Savognin e da Scuol. Glieud giuvna stat sco ambassaduras ed ambassadurs da la lingua e cultura rumantscha en il center da la segunda «Emna rumantscha». En la Chasa federala sa scuntran questas scolaras e quests scolars cun il president da la Confederaziun Ignazio Cassis e cun il cusseglier guvernativ Jon Domenic Parolini. Ensemen vegnin nus a derasar la «Emna rumantscha» sin il mund e – per l'ulteriur decurs da l'emna – dain nus vinavant il scepter a las represchentanzas svizras, las qualas vegnan medemamain a sa deditgar a la lingua e cultura rumantscha.

Ina da quatter linguas naziunalas
La data simbolica per la «Emna rumantscha» è ils 20 da favrer: Ils 20 da favrer 1938 è la lingua rumantscha vegnida renconuschida uffizialmain en ina votaziun dal pievel sco quarta lingua naziunala – cun ils medems dretgs sco il tudestg, il franzos ed il talian. Che rumantsch vegn discurrì mo da 0,5 pertschient da la populaziun svizra, n'ha nagina relevanza. Per las linguas naziunalas da la Svizra na vala nagina rangaziun.

Infurmaziuns:

Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e‑mail Jondomenic.Parolini@ekud.gr.ch

Responsabladad: Departament d'educaziun, cultura e protecziun da l'ambient