Cun l'emprima badigliada tradiziunala ha il chantun Grischun lantschà oz il cumenzament uffizial da las lavurs da construcziun per la renovaziun dal center da dietas Plantahof a Landquart. Suenter ina fasa intensiva da planisaziun dal project da construcziun e da la realisaziun da las lavurs vegnan ussa fin l'onn 2025 renovads ils singuls edifizis en etappas. L'infrastructura dal center da dietas è da gronda impurtanza per il Plantahof e per l'agricultura en il chantun Grischun.

Suenter in temp da manaschi da pli che 40 onns han ils edifizis dal center da dieta respectivamain la sala, la cuschina e l'alloschi in grond basegn da renovaziun. En divers secturs na correspundan ils edifizis betg pli a las prescripziuns ed als standards che valan ozendi. Per tegnair quint dals differents basegns d'utilisaziun che sa midan è il Plantahof dependent d'ina infrastructura multifara, moderna e cunvegnenta.

Preparativas intensivas per project grond
En la votaziun dal pievel dals 9 da favrer 2020 han las votantas ed ils votants dal Grischun approvà la renovaziun dal center da dietas Plantahof cun il credit d'impegn en l'autezza da 24,5 milliuns francs. Planisà e realisà vegn il project da construcziun tras la cuminanza da lavur Nickisch Walder Architects (Flem) e Planalytik (Flums) ensemen cun il team spezialisà da planisaziun. Il project da construcziun e la planisaziun da la realisaziun da las lavurs èn vegnids elavurads en stretga collavuraziun tranter tut las persunas participadas al project dal team da planisaziun, dal Plantahof e da l'Uffizi da construcziun auta. Il mars 2021 ha la vischnanca da Landquart concedì la permissiun da construcziun per il project grond.

Infrastructura moderna e flexibla
La renovaziun dal center da dietas pussibilitescha da separar manaschialmain ils edifizis e da metter a disposiziun ina infrastructura moderna che po vegnir utilisada en moda flexibla. La realisaziun da l'edifizi en il standard da Minergie-P-Eco permetta da construir en moda energeticamain effizienta e schanegiond las resursas. Cun il project vegnan il medem mument ademplidas las pretensiuns e prescripziuns legalas areguard la tecnologia ecologica e la tecnologia da segirtad sco er areguard las disposiziuns legalas davart la promoziun da las persunas cun impediments. Cun ils edifizis projectads vegn meglierà d'ina vart cleramain l'aspect exteriur dal Plantahof e da l'autra vart vegnan structurads en moda precisa e d'auta qualitad ils spazis exteriurs ed intermediars da l'institut.

L'element essenzial dal stabiliment è la sala da mangiar en il center sco lieu d'inscunter e da colliaziun tranter l'edifizi principal, la scola, l'auditori Weber ed il nov edifizi da la cuschina. Grazia a la cumbinaziun en in local da la sala da mangiar e da la cafetaria po l'infrastructura vegnir utilisada en moda flexibla e confurma als basegns. L'edifizi da la cuschina cun ils locals accessorics correspundents pussibilitescha d'elavurar e da conservar ils products stagiunals che vegnan racoltads sin il bain. Las chombras en l'alloschi han in standard da construcziun modern e pon vegnir duvradas sco chombras singulas u sco chombras dublas.

La nova infrastructura al Plantahof permetta perspectivas attractivas en la scolaziun ed en la furmaziun supplementara da la generaziun giuvna da puras e purs sco er en la cussegliaziun da famiglias da purs.

Realisaziun dal project en etappas
Ils novs edifizis èn concepids uschia, ch'il manaschi po cuntinuar durant l'entira fasa da construcziun e ch'i na dovra nagins locals provisorics pli gronds. Cun in proceder en etappas po il project vegnir realisà schanegiond tant sco pussaivel las resursas. L'emprim vegn construì l'alloschi, suenter la cuschina e la sala. La retratga da l'alloschi vegn previsiblamain ad avair lieu la primavaira 2023. Per la fin da l'onn 2024 èsi planisà da prender en funcziun la cuschina e la sala. La finiziun dal project cun las lavurs da conturn vegn fatga la primavaira 2025.

Fotografia agiuntada:

Visualisaziuns:

• plan da situaziun cun l'etappaziun
• l'entrada cun il Russhof (1811), l'auditori Weber (2010), la sala e l'edifizi da la cuschina. Visualisaziun: Nickisch Walder Architects
• la sala da mangiar, vista en direcziun da la cafetaria cun la curt interna colliada cun l'edifizi da scola, da la vart l'entrada tar l'auditori Weber (2010), davosvart il Russhof (1811). Visualisaziun: Nickisch Walder Architects

Infurmaziuns:

• cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch (cuntanschibel da las 14.00 fin las 15.30)
  
• Markus Dünner, architect chantunal, Uffizi da construcziun auta, tel. +41 81 257 36 31, e-mail Markus.Duenner@hba.gr.ch (cuntanschibel da las 12.00 fin las 13.30)

Responsabladad: Uffizi da construcziun auta