Ils 15 da matg 2022 han lieu las elecziuns dal Cussegl grond. Fin ier èn entradas tar la Chanzlia chantunala dal Grischun 167 propostas electoralas resumadas en 5 gruppas da glistas cun tut en tut 491 candidatas e candidats.
La procedura per inoltrar las propostas electoralas è stada decentrala, numnadamain organisada sin plaun regiunal, ed ha cumpiglià las suandantas etappas:
- 21 da favrer 2022, a las 12.00: ultim termin per inoltrar las propostas electoralas tar las regiuns
- 28 da favrer 2022, a las 18.00: eventuala rectificaziun da las propostas electoralas tras las regiuns
- 2 da mars 2022, a las 12.00: ultim termin per transmetter las glistas definitivas e giuridicamain liantas tras las regiuns a la Chanzlia chantunala
Fin ier, ils 2 da mars 2022, han las regiuns transmess a la Chanzlia chantunala dal Grischun 167 propostas electoralas resumadas en 5 gruppas da glistas cun tut en tut 491 candidatas e candidats (154 dunnas, 336 umens, 1 persunas indefinidas).
Resalvadas restan eventualas rectificaziuns chantunalas (candidaturas multiplas / designaziuns da glistas) e la numeraziun da las glistas.
Denominaziuns da las gruppas da glistas
Per las 5 gruppas da glistas èn vegnidas annunziadas las suandantas designaziuns a la Chanzlia chantunala:
- Allianza dal Center dal Grischun (Center GR)
- PLD.Ils Liberals (PLD)
- Partida verd-liberala (pvl)
- PS & La Verda (PS & Verda)
- PPS dal Grischun (PPS)
Decisiun tras la sort per ils numers da las glistas
Per ils numers da las glistas vegni tratg la sort ils 8 da mars 2022. Suenter la decisiun tras la sort, vers las 15.30, vegnan ils resultats publitgads en l'internet sin www.gr.ch.
Las gruppas da glistas, las glistas e tut las candidatas ed ils candidats vegnan la finala publitgads uffizialmain ils 10 da mars 2022 en il Fegl uffizial chantunal.
Agiunta
Glistas e candidatas e candidats
Infurmaziuns:
Daniel Spadin, chancelier, Chanzlia chantunala, tel. +41 81 257 22 21, e-mail Daniel.Spadin@staka.gr.ch
Responsabladad: Regenza