Fugitivas e fugitivs da l'Ucraina tschertgan pli e pli savens protecziun en Svizra ed er en il Grischun. Per pudair garantir immediatamain la protecziun da las fugitivas e dals fugitivs da la guerra e per pudair liquidar las incumbensas respectivas, installescha la Regenza in stab parzial. Plinavant vegn endrizzà in post da communicaziun central. Per la populaziun na dovri actualmain naginas mesiras da protecziun spezialas.

Passa dus milliuns umans han bandunà l'Ucraina durant las duas emnas passadas en direcziun dal territori da Schengen. Er en Svizra tschertgan fugitivas e fugitivs da l'Ucraina pli e pli savens protecziun. Ils scenaris dal Secretariat da stadi per migraziun (SEM) partan dal fatg che var 35 000 fin 50 000 persunas pudessan tschertgar in refugi en Svizra fin la fin da matg 2022. La clav da repartiziun naziunala prevesa che fin 3 pertschient da las fugitivas e dals fugitivs vegnan attribuids al chantun Grischun.

Planisaziun preventiva per collocar e per assister fugitivas e fugitivs
Per pudair garantir immediatamain la protecziun da las persunas che entran en Svizra e per pudair liquidar las incumbensas respectivas, installescha la Regenza in stab parzial. Quel coordinescha las incumbensas tant entaifer il chantun sco er cun ils servetschs federals e fa ina planisaziun preventiva per collocar e per assister las fugitivas ed ils fugitivs. Integrads en il stab parzial èn actualmain l'Uffizi da migraziun e da dretg civil (UMDC), l'Uffizi da militar e da protecziun civila (UMPC), l'Uffizi dal servetsch social (USo) sco er l'Uffizi per la scola populara ed il sport (USS).

Post da communicaziun central per dumondas en connex cun l'Ucraina
Perquai ch'il basegn d'infurmaziun da la populaziun crescha, endrizza il chantun in post da communicaziun central. Sin la pagina d'internet chantunala www.gr.ch/ucraina vegnan publitgadas cuntinuadamain infurmaziuns en connex cun l'Ucraina. La pagina dat ina survista da las purschidas d'agid, dals alloschis privats e collectivs e dals posts da contact, respunda dumondas frequentas e vegn actualisada cuntinuadamain.

Assistenza optimala da fugitivas e da fugitivs gia entrads en Svizra grazia a la registraziun
Las persunas da l'Ucraina pon entrar libramain en Svizra e sa trategnair fin 90 dis senza visum en noss pajais. Dapi ils 12 da mars 2022 survegnan ellas plinavant il status da protecziun «S» en Svizra. Quai vul dir ch'ellas pon restar per entant in onn en Svizra senza procedura d'asil, ch'ellas pon lavurar e ch'ils uffants pon ir a scola qua. Per pudair assister optimalmain las persunas che tschertgan protecziun, vegni recumandà a las persunas da l'Ucraina che han – pervia dals conflicts – gia chattà in refugi tar persunas privatas en il Grischun, da sa registrar sin www.gr.ch/ucraina. Mintga persuna che tschertga protecziun s'annunzia en il cas ideal directamain en in dals centers federals d'asil (CFA), cura ch'ella arriva en Svizra. Là vegn mintga singula dumonda examinada individualmain, ed i vegn giuditgà, sche la persuna po vegnir attribuida a la gruppa cun il status da protecziun «S». Questa examinaziun dura maximalmain 1 fin 3 dis. Silsuenter vegn la persuna attribuida ad in chantun. Il chantun decida, sch'el collochescha sez la persuna u sch'el organisescha – en collavuraziun cun l'Agid svizzer als fugitivs (ASF) – ina collocaziun tar persunas privatas.

Per la populaziun na dovri naginas mesiras da protecziun spezialas
Il chantun Grischun ha ina purschida suffizienta da plazzas protegidas per la populaziun grischuna. Actualmain n'èsi betg necessari da sa preparar per ina dimora en ils locals da protecziun. Pervia da las mutaziuns da la populaziun (partenzas u arrivs, midadas d'adressa, activitads da construcziun e.u.v.) na vegn la populaziun betg infurmada activamain davart il stadi actual da la planisaziun da l'attribuziun. Quella inditgescha mo la situaziun mumentana e po sa midar da tut temp. Ina communicaziun publica da la planisaziun da l'attribuziun ha lieu pir, cura che quai è necessari pervia da la situaziun da la politica da segirezza respectivamain cura che l'Uffizi federal da protecziun da la populaziun (UFPP) ordinescha quai.

Areguard la situaziun actuala n'èsi er betg necessari da prender tablettas da jod. Ed i vegn scusseglià urgentamain da prender talas tablettas ord atgna iniziativa, senza che quai saja vegnì ordinà da la Centrala naziunala d'alarm (CENAL). Pir en cas d'in eveniment cun radioactivitad augmentada vegnan questas tablettas ordinadas da la Confederaziun (CENAL). Las tablettas vegnan lura repartidas dal chantun a las vischnancas e da las vischnancas a la populaziun.

Infurmaziuns:

Responsabladad: Regenza