Il quint chantunal 2021 mussa in resultat total cun in surpli dal retgav considerabel da 134,3 milliuns (onn precedent +81,9 miu.). Il plus operativ è cun 139,4 milliuns francs (onn precedent +78,8 miu.) mo pauc pli aut. Ultra d'intginas posiziuns d'expensas cleramain pli bassas cumpareglià cun il preventiv han la distribuziun sextupla dal gudogn da la Banca naziunala svizra (BNS) da 93 milliuns, gudogns da contabilitad sin investiziuns finanzialas da 73 milliuns, autas participaziuns a retgavs federals sco er entradas fiscalas nunspetgadamain grondas contribuì a quest bun resultat. Pervia da la pandemia da COVID-19 èn resultadas grevezzas supplementaras da brutto 316 milliuns. La Confederaziun ha però surpiglià la part principala dals custs da la pandemia. Per il chantun restan netto 88 milliuns (onn precedent 60 miu.). Las finanzas chantunalas èn vinavant posiziunadas bain per dumagnar las sfidas futuras.

Las valurs directivas ed ils indicaturs 2021 (onn precedent en parantesas) mussan il suandant maletg:

• resultat operativ 139,4 milliuns (78,8 miu.)
• resultat total 134,3 milliuns (81,9 miu.)
• entradas fiscalas 819,2 milliuns (836,0 miu.)
• investiziuns bruttas 322,7 milliuns (339,4 miu.)
• investiziuns nettas 189,4 milliuns (200,5 miu.)
• quota statala 14,9 pertschient (14,0 %)
• grad d'atgna finanziaziun da las investiziuns nettas 175,3 pertschient (135,1 %)
• agen chapital a libra disposiziun 627,8 milliuns (552,2 miu.)

Differents retgavs supplementars essenzials e sutpassaments considerabels dal preventiv
Cun totalmain 407 milliuns sutpassan ils custs da persunal considerablamain il preventiv per 3 milliuns, cumbain ch'i è vegnida furmada ina retenziun per la garanzia chantunala da 10 milliuns a favur da las rentas currentas da la Cassa da pensiun dal Grischun (CPGR) per il 31 da december 2021. Dals credits tenor preventiv da totalmain 354 milliuns per ils custs materials e per ils custs da manaschi n'èn 28 milliuns betg vegnids duvrads. Sin basa da las investiziuns nettas ch'èn stadas marcantamain sut las aspectativas, èn er las amortisaziuns da la facultad administrativa da 34 milliuns stadas pli bassas che budgetà. Gidà a reducir las expensas per 26 milliuns han credits tenor preventiv per contribuziuns d'investiziun a terzas persunas, che n'èn betg vegnids duvrads. Quels èn vegnids amortisads cumplettamain durant l'onn da gestiun.

Il fitg bun resultat total è marcà da la surpigliada dals custs nunspetgadamain auta tras la Confederaziun en il rom dal cumbat cunter la pandemia da COVID-19. Plinavant derivan las midadas positivas da las suandantas posiziuns (cumparegliaziun cun il preventiv / cun l'onn precedent):

• distribuziun sextupla dal gudogn da la BNS (+30,7 miu. / +30,6 miu.)
• rectificaziun da la valur da las investiziuns en la facultad finanziala (+73,4 miu. / +33,2 miu.)
• part chantunala da la taglia federala directa e da la taglia anticipada (+8,7 miu. / +22,0 miu.)
• retgav fiscal (+66,9 miu / -16,8 miu.)
• rectificaziun da la valur dals credits (+18,5 miu. / +34,2 miu.)

Tar las taglias chantunalas èn las taglias directas da las persunas natiralas (taglias sin las entradas, taglias sin la facultad e taglias a la funtauna sco er taglias sin las expensas da las persunas estras) creschidas cleramain cumpareglià cun il preventiv (+48,7 miu. / +9,0 %). En cumparegliaziun cun l'onn precedent (-13,6 miu. / -2,3 %) sto vegnir registrada ina leva reducziun. Er las taglias directas da las persunas giuridicas (taglias sin il gudogn e sin il chapital) èn sur il preventiv (+8,4 miu. / +11,8 %) e sut l'onn precedent (-10,8 miu. / -11,9 %). La reducziun dals retgavs fiscals per 50 milliuns, spetgada en il preventiv 2021 e chaschunada da la pandemia, n'ha legraivlamain betg gì lieu per gronda part.

La finanziaziun speziala Vias mussa in surpli da 6,3 milliuns durant l'onn da rapport, senza la contribuziun dals meds publics generals (preventiv -20 miu. tar ina contribuziun da 20,175 miu. or dals meds publics generals). Questa meglieraziun dal resultat per 46 milliuns deriva cunzunt d'expensas d'investiziun pli pitschnas pervia da retards da projects. Il dabun da las vias resta sin il maximum legal da 100 milliuns.

Resultat extraordinari gulivà
Valitaziuns sin il martgà da las investiziuns finanzialas tegnidas dal chantun en l'interess politic (aczias da la Repower SA, certificats da participaziun da la Banca chantunala grischuna ed aczias da la Ems-Chemie Holding) han chaschunà gronds gudogns da revalitaziun da 56,4 miu. en il resultat extraordinari. Il resultat extraordinari cuntegna plinavant las prelevaziuns ord las reservas per il tunnel da l'Alvra da la Viafier retica (+2,0 miu.), per las infrastructuras relevantas per il sistem (+2,4 miu.) e per la promoziun da la transfurmaziun digitala (+1,1 miu.). Tras l'apport da 67 milliuns en la prefinanziaziun dal credit d'impegn per realisar la 1. etappa dal Plan d'acziun «Green Deal GR» vegn cuntanschì in resultat extraordinari praticamain gulivà.

Agen chapital crescha tras surpli dal retgav
Il resultat total mussa in surpli dal retgav da 134,3 milliuns. L'agen chapital cumprovà importa 2,8 milliardas suenter la cudeschaziun dal gudogn. Da quai èn 628 milliuns agen chapital a libra disposiziun (onn precedent 552 miu.). Las ulteriuras 2,2 milliardas èn liadas en la facultad administrativa, ad investiziuns finanzialas sco er a finanziaziuns spezialas ed a prefinanziaziuns.

Investiziuns nettas levamain pli bassas che l'onn precedent
Las investiziuns nettas importan l'onn da rapport 189,4 milliuns e sutpassan uschia la valur da l'onn precedent per 11,1 milliuns. En il preventiv eran planisadas investiziuns nettas da 271,6 milliuns. Per ils projects currents da la construcziun auta e bassa sco er per ulteriuras investiziuns materialas èn resultadas expensas da tut en tut 132,0 milliuns (onn precedent -14,7 miu.; preventiv -40,7 miu.). La reducziun deriva principalmain da la finiziun da projects gronds sco er da retards tar projects da construcziun. Cun 159,6 milliuns èn er las atgnas contribuziuns d'investiziun a terzas persunas cleramain sut il preventiv (-29,2 miu.).

Perspectiva
Davart il resultat da l'onn current 2022 na pon ins anc far naginas explicaziuns. Las mesiras e las contribuziuns en connex cun la pandemia da COVID-19 vegnan a laschar enavos fastizs er en il quint chantunal da l'onn 2022. Per ils onns suandants fan ins quint cun in rom finanzial pli e pli stretg. Las contribuziuns ord la gulivaziun da resursas naziunala vegnan temporarmain a sa reducir en moda decisiva. Cunzunt ils retgavs che dependan dal svilup sin ils martgads da finanzas, sco la distribuziun dal gudogn da la BNS e las midadas da la valur da las investiziuns en la facultad finanziala, n'èn betg garantids. Il legraivel resultat annual 2021 e la basa finanziala fitg solida dal chantun furman in bun fundament per las sfidas finanzialas futuras.

Il Cussegl grond vegn a tractar il quint annual 2021 en la sessiun da zercladur 2022.

Agiuntas:

Bilantscha per ils 31 da december 2021

Quint economic 2021

Quint d'investiziun 2021

Infurmaziuns:

Cusseglier guvernativ dr. Christian Rathgeb, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch

Responsabladad: Departament da finanzas e vischnancas