Il chantun Grischun è giast d'onur a la OLMA da quest onn a Son Gagl. Sut il motto «simplamain da nar!» sa preschenta el dals 13 fin ils 23 d'october 2022 sco chantun attractiv d'abitar e da lavurar ed er sco chantun tradiziunal e modern da turissem, da furmaziun, da cultura e d'agricultura a la fiera publica la pli gronda da la Svizra.

Ultra da plazzas da lavur attractivas ed innovativas porscha il pli grond chantun da la Svizra anc bler dapli: El è il dachasa da sia populaziun trilingua e spazi da recreaziun per ils giasts da dalunsch e da damanaivel. Lieus d'abitar attractivs, ina cuntrada natirala e cultira intacta cun in'agricultura innovativa en cumbinaziun cun purschidas multifaras da furmaziun e da temp liber, sco er cun instituziuns da perscrutaziun da renum mundial, caracteriseschan il chantun Grischun. Durant indesch dis po questa diversitad vegnir experimentada en moda fascinanta e surprendenta e tuttina autentica a la fiera svizra per agricultura e nutriment – «simplamain da nar!».

Il motto «simplamain da nar!» represchenta la diversitad e la singularitad dal chantun da muntogna. Il motto sa tira sco in fil cotschen tras la preschentaziun ospitanta e duai far ina impressiun durabla a las visitadras ed als visitaders.

Preschentaziun ospitanta sco vitrina vers il Grischun
Sco chantun ospitant concepescha il Grischun la festa d'avertura da quest onn, il «Di dal chantun envidà» cun il til tradiziunal da la OLMA tras il center da la citad da Son Gagl sco er las numerusas preschentaziuns d'animals. Var 700 participantas e participants da tut las regiuns dal chantun dattan furma al til. Sin l'areal da la OLMA daventa l'exposiziun speziala dal Grischun in lieu d'inscunter per las visitadras ed ils visitaders da la OLMA.

L'exposiziun speziala porscha in spazi d'aventura e d'experientscha autentic – qua frunta tradiziun sin innovaziun. La plazza dal vitg furma il center ed envida cun sia purschida ritga da cultura da giudiment alpina da sa fermar e da giudair. Trais pavigliuns circumdeschan la plazza dal vitg. Els porschan invista en la «Metropola natirala Grischun» ed envidan da scuvrir la cuntrada da furmaziun e da perscrutaziun innovativa dal Grischun. En il lavuratori sa preschenta mastergn vegl e nov.

Il Grischun è dapi l'onn 2003 per l'emprima giada puspè chantun ospitant
La fiera svizra per agricultura e nutriment «OLMA» vala sco la fiera publica la pli gronda da la Svizra e dura 11 dis. Ella attira mintga onn passa 350 000 visitadras e visitaders ed ha lieu dals 13 fin ils 23 d'october 2022. Il chantun Grischun è stà l'ultima giada l'onn 2003 chantun ospitant. La preschentaziun ospitanta a la OLMA 2022 vegn realisada sut la direcziun generala dal president da la Regenza, Marcus Caduff, e sin il champ operativ d'ina vasta gruppa da project sut la direcziun da Daniel Camenisch, Vinavant SA.

Ulteriuras infurmaziuns davart la preschentaziun ospitanta dal Grischun a la OLMA vegnan publitgadas cuntinuadamain sin la pagina d'internet olma22.gr.ch.

Visualisaziun:

L'exposiziun speziala

Agiunta:

Preschentaziun da la conferenza da medias

Infurmaziuns:

• Marcus Hassler, secretari dal Departament d'economia publica e fatgs socials, tel. +41 81 257 23 12, e-mail Marcus.Hassler@dvs.gr.ch (cuntanschibel da las 13.00 fin a las 14.00 e da las 15.00 fin a las 16.00)
• Daniel Camenisch, manader da project per la preschentaziun ospitanta dal chantun Grischun, tel. +41 81 661 20 20, e-mail camenisch@vinavant.ch (cuntanschibel da las 13.00 fin a las 15.00)

Responsabladad: Departament d'economia publica e fatgs socials