L'exposiziun ambulanta «Rumantsch è…», ina iniziativa dal cusseglier guvernativ Christian Rathgeb, è da vesair da mez avrigl fin la fin da matg en il Seminari da Romanistica da l'Universitad da Turitg. Ella sensibilisescha per il rumantsch, gida a colliar ed envida las visitadras ed ils visitaders sezzas e sezs da «semnar lingua».

Ina finamira impurtanta da l'exposiziun ambulanta è da far attent a las Rumantschas ed als Rumantschs che vivan ordaifer ils territoris da derasaziun tradiziunals da la lingua. En il chantun ed en la citad da Turitg abita ina diaspora rumantscha spezialmain gronda.

Chaussas interessantas davart il rumantsch
Fin l'onn 1100 discurriva la glieud rumantsch lunsch suror ils cunfins actuals dal chantun Grischun. Il territori linguistic rumantsch tanscheva al nord fin a Feldkirch e s'extendeva pia sur ina gronda part dal pajais federativ austriac Vorarlberg. Er a Sargans ed al Lai Rivaun discurriva la glieud rumantsch. Quai è mo in dals cuntegns da l'exposiziun «Rumantsch è…».

L'exposiziun po vegnir visitada dals 19 d'avrigl fin ils 24 da matg 2022 mintgamai da glindesdi fin venderdi da las 8.00 fin las 19.00 en il Seminari da Romanistica da l'Universitad da Turitg (Zürichbergstrasse 8).

Inauguraziun e migraziun
L'exposiziun vegn inaugurada festivamain ils 4 da matg 2022 a las 18.30. Prof. dr. Thomas Klinkert, parsura dal Seminari da Romanistica, cusseglier guvernativ dr. Christian Rathgeb, president da la Conferenza da las regenzas chantunalas (CdC), Diego Deplazes, secretari general da la Lia Rumantscha e prof. dr. Rico Valär, professer da litteratura e cultura rumantscha vegnan a pledentar ils giasts. Igl è pussaivel da s'annunziar per l'avertura sut www.rumantsch-e.ch/annunzia (dumber da plazzas limità).

L'exposiziun ambulanta «Rumantsch è…» è in project dal chantun Grischun. Ella è vegnida creada en collavuraziun cun la Lia Rumantscha, cun la Promoziun da la cultura dal Grischun e cun la CdC. Fin ussa è ella sa fermada a Berna, a Cuira ed a Lucerna e migrescha en il decurs da l'onn en ulteriurs chantuns. Sut www.rumantsch-e.ch chattais Vus las indicaziuns davart ils lieus da l'exposiziun. L'exposiziun po vegnir contemplada là er online.

Agiunta:

flyer

Infurmaziuns:

• Cusseglier guvernativ dr. Christian Rathgeb, schef dal Departament da finanzas e vischnancas, president da la Conferenza da las regenzas chantunalas, tel. +41 81 257 32 01, e‑mail Christian.Rathgeb@dfg.gr.ch (per dumondas davart l'exposiziun ambulanta)
• Prof. dr. Rico Valär, professer da litteratura e cultura rumantscha, tel. +41 44 634 36 22, e‑mail Rico.Valaer@rom.uzh.ch (per dumondas davart il lieu d'exposiziun Turitg)

Responsabladad: Departament da finanzas e vischnancas