En sia sesida dals 13 d'avrigl 2022 ha il Cussegl federal concludì da prolungar il pajament da las indemnisaziuns da las perditas ad interpresas culturalas ed ad artistas ed artists per 2 mais fin la fin da zercladur 2022. Plinavant è vegnì precisà il champ d'applicaziun per ils projects da transfurmaziun.

Suenter l'aboliziun da tut las mesiras per cumbatter cunter l'epidemia da COVID-19 la fin da mars 2022, fissan las indemnisaziuns da las perditas ad interpresas culturalas ed ad artistas ed artists sco er ils agids finanzials ad uniuns culturalas da laics scadids la fin d'avrigl 2022. Perquai che las sfidas en il sectur cultural n'èn betg terminadas immediatamain, ha il Cussegl federal concludì ils 13 d'avrigl 2022 da prolungar omaduas mesiras da sustegn per 2 mais fin la fin da zercladur 2022.

Agids finanzials pon vegnir dumandads vinavant
Per il donn finanzial che resulta tras l'annullaziun, tras il spustament u tras la restricziun da la realisaziun d'occurrenzas e da projects u tras restricziuns dal manaschi en consequenza da la realisaziun da mesiras statalas per cumbatter cunter il coronavirus ubain pervia da la consequenza negativa da las mesiras per cumbatter cunter il coronavirus, pon interpresas culturalas ed artistas ed artists dumandar ina indemnisaziun da las perditas en furma d'in agid finanzial betg restituibel.

Plinavant è vegnì precisà il champ d'applicaziun per ils projects da transfurmaziun. Uschia han las dumondas da pliras uniuns da laics ensemen er il dretg d'inoltrar projects da transfurmaziun. Ultra da quai pon er artistas ed artists sezs, en furma d'ina cuminanza da lavur autonoma da dretg public, inoltrar ina dumonda da promoziun. Agids finanzials pon vegnir pajads mo a projects che han in connex causal cun l'epidemia da COVID-19, q.v.d. a projects, cun ils quals l'interpresa culturala vul obtegnair in'adattaziun a las relaziuns midadas pervia da l'epidemia da COVID-19. Dumondas per contribuziuns a projects da transfurmaziun pon vinavant vegnir inoltradas fin ils 30 da november 2022.

Infurmaziuns actualas sco er ils formulars da dumonda correspundents stattan a disposiziun sin la pagina d'internet www.kfg.gr.ch.

Infurmaziuns:

• Barbara Gabrielli, manadra da l'Uffizi da cultura, tel. +41 81 257 48 01, e-mail Barbara.Gabrielli@afk.gr.ch
• Andrea Conrad, substituta da la manadra da la partiziun Promoziun da la cultura dal Grischun, tel. +41 81 257 48 07, e-mail Andrea.Conrad@afk.gr.ch

Responsabladad: Uffizi da cultura