La Regenza ha revedì l'Ordinaziun tar la Lescha da scola en dus puncts. D'ina vart pon contribuziuns chantunalas a la scolaziun da manadras e manaders da scola vegnir pajadas da nov gia a partir dal cumenzament da la scolaziun. Da l'autra vart surpiglia il chantun da nov ils daners da scola sco er ils eventuals custs da transport per quels uffants che ston per motivs specifics midar la scola.

Tras la revisiun parziala da l'Ordinaziun tar la Lescha da scola vegnan sustegnids ils purtaders da scola che na chattan nagina manadra u nagin manader da scola cun ina furmaziun supplementara terminada en il sectur da la direcziun da scola. Da nov pon vegnir concedidas contribuziuns chantunalas a partir dal cumenzament da la scolaziun, premess che la scolaziun renconuschida en il sectur da la direcziun da scola vegnia terminada cun success entaifer maximalmain 3 onns dapi il cumenzament.

Il chantun surpiglia ils daners da scola, sch'i n'èn betg avant maun alternativas equivalentas
Cun la revisiun vegn plinavant er realisada l'incumbensa Ulber ch'era vegnida acceptada en la sessiun d'october 2021. En intgins cas na pon las mesiras da la pedagogia speziala en il sectur pretensius (scolaziun speziala integrativa), ch'èn vegnidas ordinadas da l'Uffizi per la scola populara ed il sport, betg vegnir realisadas en la scola regulara dal purtader da scola cumpetent, e quai per motivs che n'èn betg en l'interess persunal da las persunas responsablas per l'educaziun u da l'uffant. Perquai daventi necessari da midar il purtader da scola. Premissa per ch'il chantun surpiglia ils daners da scola è, ch'ils motivs per l'eventuala midada hajan in connex direct cun la realisaziun da las mesiras da la pedagogia speziala ordinadas. Sche quai è il cas, sto la scolara pertutgada u il scolar pertutgà vegnir instruì en l'instituziun da scola adattada la pli vischina. La necessitad da midar il purtader da scola po per exempel resultar da motivs chaschunads da l'impediment. En quests cas paja da nov il chantun – empè da sco fin ussa il purtader da scola cedent – ils daners da scola sco er ils eventuals custs da transport. 

Infurmaziuns:

Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 15.30 fin las 16.30), e‑mail Jondomenic.Parolini@ekud.gr.ch

Responsabladad: Regenza