Il chantun Grischun cumpra aczias supplementaras da la Repower SA ed augmenta sia participaziun a 27,0 pertschient. Quest pass stat en concordanza cun la finamira dal Cussegl grond e da la Regenza da puspè laschar daventar pli «grischuna» la Repower e da la rinforzar vinavant sco interpresa d'electricitad grischuna. Quai en vista a la realisaziun da la nova Strategia chantunala concernent la forza idraulica.
Sco unica interpresa dal provediment d'energia cun sedia en il chantun ha la Repower tut las cumpetenzas centralas per lung da la chadaina da valurisaziun davent da la producziun sur il commerzi e la distribuziun fin al provediment d'electricitad per la clientella finala. Sco interpresa en il sectur da la producziun d'electricitad ord energias regenerablas e da lur grond potenzial per il provediment d'energia dal Grischun e per las sfidas da la politica dal clima ha ella er ina gronda impurtanza per l'economia publica, per la politica regiunala e per l'economia da finanzas.
L'impurtanza da la cumpra d'aczias per la Strategia grischuna concernent la forza idraulica
In rinforzament da la posiziun dal chantun en l'acziunariat correspunda perquai a las finamiras dal Cussegl grond e da la Regenza en connex cun la realisaziun da la Strategia grischuna concernent la forza idraulica. Plinavant correspunda quai en spezial er a las aspectativas dal parlament chantunal confurm a ses conclus en il rom dal tractament da la Strategia chantunala concernent la forza idraulica durant la sessiun da favrer 2022. Tras la cumpra d'aczias supplementaras da la Repower or dal pachet d'aczias ch'era fin ussa en possess da l'Axpo e tras l'augment da la participaziun dal chantun a la Repower ademplescha la Regenza questa incumbensa politica dal Cussegl grond e s'avischina a la finamira declerada per dapli cooperaziun e pais en l'interpresa. Ulteriurs pass vegnan examinads e realisads, sche las cundiziuns generalas èn avant maun. Quai cun la finamira da posiziunar la Repower – sco interpresa grischuna impurtanta dal provediment d'energia – vinavant en moda attractiva en il sectur da l'economia d'energia, er en vista a la realisaziun da la nova Strategia chantunala concernent la forza idraulica.
L'Axpo è la producenta la pli gronda d'electricitad ord forza idraulica en Svizra. En il rom d'ina rectificaziun strategica dal portfolio è l'Axpo sa decidida da vender sia cumpart d'aczias da la Repower en l'autezza da 12,69 pertschient. Suenter tractativas da cumpra intensivas è il pachet d'aczias vegnì surpiglià dals trais acziunaris principals restants, numnadamain dal chantun Grischun, da las Ovras electricas dal chantun Turitg (EKZ) e dal fond UBS Clean Energy Infrastructure Switzerland (UBS-CEIS). Cun 5,04 pertschient èsi reussì al chantun Grischun d'acquirir la part la pli gronda dal pachet. La participaziun substanziala dal chantun importa pia da nov 27,0 pertschient. La EKZ ha surpiglià 4,45 pertschient dal pachet da l'Axpo (nova quota da participaziun: 38,49 pertschient), il fond UBS-CEIS 3,2 pertschient (nova quota da participaziun: 22,08 pertschient). Areguard il dretg da finanzas correspunda la participaziun dal chantun a la Repower SA ad ina investiziun finanziala che vegn tegnida – sper autras participaziuns en il sectur da l'electricitad – en in interess politic surordinà. La cumpra da participaziuns è ina cumpetenza definitiva da la Regenza. Davart il pretsch da vendita da las aczias èn ins sa cunvegnì da dar naginas infurmaziuns.
Vinavant trais ferms acziunaris principals per la Repower
Cun il chantun, ma er cun la EKZ e cun il fond UBS-CEIS ch'èn participads a la Repower dapi l'onn 2016, restan trais ferms acziunaris principals cun differentas cumpetenzas centralas en l'acziunariat da la Repower. Suenter l'extrada da l'Axpo fixeschan ils acziunaris principals da nov la cooperaziun en l'interess da la Repower e resguardond las aspectativas ed ils giavischs dal chantun. En quest connex persequitescha la Regenza er vinavant la finamira da garantir a la Repower – sco interpresa manada tenor princips economics cun gronda valurisaziun en il chantun – cundiziuns generalas favuraivlas, inclusiv ina basa fidada duraivla en il circul dals acziunaris principals.
Infurmaziuns:
- Cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01 (cuntanschibel la gievgia da las 10.30 fin las 15.00), e-mail Mario.Cavigelli@diem.gr.ch
- Cusseglier guvernativ dr. Christian Rathgeb, schef dal Departament da finanzas e vischnancas, e-mail Christian.Rathgeb@dfg.gr.ch
Responsabladad: Regenza