Las proximas fins d'emna vegni a dar il pli grond traffic da viadi. Perquai vegnan reprendidas las mesiras ch'eran vegnidas realisadas durant ils firads da primavaira (Pasca, Ascensiun, Tschuncaisma) sco emprova da pilot. L'effect da las mesiras vegn persequità ed analisà intensivamain. Ils resultats vegnan ad esser avant maun la segunda mesadad da settember.

Durant las fins d'emna da stad vegnan spetgadas en general damain situaziuns cun colonnas gravantas che sur Pasca, sur Ascensiun u sur Tschuncaisma. Tenor l'experientscha è il volumen da traffic che sa mova en direcziun da las destinaziuns turisticas grischunas bler pli pitschen durant la stad che durant ils firads da primavaira. Quai dat dapli spazi per dumagnar il volumen da traffic pli grond dal nord al sid e viceversa durant las fins d'emna da stad. Tuttina vegni a dar er questa stad colonnas e traffic da guntgida en il conturn dal tunnel Isla Bella.

Prognosas exactas èn fitg difficilas per il mument e cuntegnan pliras intschertezzas. Tranter auter dependa il volumen da traffic directamain da l'aura. Da bell'aura s'augmenta la cumpart dal traffic da destinaziun resp. da partenza da las regiuns turisticas grischunas durant las fins d'emna. Er las consequenzas da la pandemia dal coronavirus sco er dal traffic aviatic restrenschì na sa laschan strusch prognostitgar.

Mesiras per il traffic da la stad
Tenor il stadi da las enconuschientschas actualas ston ins quintar durant ils suandants dis cun colonnas spezialas: en direcziun sid las sondas dals 16 e dals 30 da fanadur ed en direcziun nord las dumengias dals 7 e dals 14 d'avust. Per reducir las difficultads respectivas han l'Uffizi da construcziun bassa dal Grischun, la Polizia chantunala dal Grischun e l'Uffizi federal da vias (UVIAS) decidì cuminaivlamain da cuntinuar cun l'emprova da pilot da la primavaira durant las quatter fins d'emna da stad cun il pli grond traffic. Realisadas vegnan las medemas mesiras sco sur Ascensiun e sur Tschuncaisma (serrada da las vias da transit tras singuls vitgs, infurmaziuns da traffic supplementaras sin la A13 e communicaziuns da traffic extendidas).

Termins da las mesiras:

En direcziun sid:

• venderdi, ils 15-07-2022, da las 08.00, fin dumengia, ils 17-07-2022, a las 08.00
• venderdi, ils 29-07-2022, da las 08.00, fin dumengia, ils 31-07-2022, a las 08.00

En direcziun nord:

• sonda, ils 06-08-2022, da las 16.00, fin glindesdi, ils 08-08-2022, a las 07.00
• sonda, ils 13-08-2022, da las 16.00, fin glindesdi, ils 15-08-2022, a las 07.00
  

Da l'extensiun da l'emprova da pilot sin las fins d'emna da stad cun il pli grond traffic spetgan las autoritads ina distgargia dals lieus pertutgads il pli fitg. Plinavant quintan ellas cun enconuschientschas supplementaras impurtantas en vista a la planisaziun d'ulteriuras mesiras.

A chaschun d'ina segunda «maisa radunda» che ha lieu la fin da settember resp. il cumenzament d'october 2022 vegnan l'Uffizi da construcziun bassa, la Polizia chantunala ed il UVIAS ad infurmar las vischnancas e las regiuns pertutgadas davart las enconuschientschas ch'èn resultadas tras las emprovas da pilot e davart l'ulteriur proceder planisà.

Infurmaziuns:

• Reto Knuchel, inschigner chantunal, Uffizi da construcziun bassa, tel. +41 81 257 35 02 (cuntanschibel fin las 15.00), e‑mail Reto.Knuchel@tba.gr.ch
• Roger Stäubli, substitut da l'inschigner chantunal, Uffizi da construcziun bassa, tel. +41 81 257 38 42 (cuntanschibel fin las 15.00), e‑mail Roger.Staeubli@tba.gr.ch
• Aluis Candinas, schef da la Polizia da traffic, Polizia chantunala dal Grischun, tel. +41 81 257 79 50, e‑mail info@kapo.gr.ch

Responsabladad: Uffizi da construcziun bassa