Ils 31 da mars 2023 fineschan las periodas d'uffizi da Christoph Caviezel sco vicepresident da la banca e da Michèle F. Sutter-Rüdisser sco commembra dal Cussegl da banca da la Banca chantunala grischuna (BCG). La Regenza grischuna ha prolungà lur mandats per 4 onns fin ils 31 da mars 2027.
Christoph Caviezel è dapi l'onn 2015 commember e dapi l'onn 2021 vicepresident dal Cussegl da banca da la Banca chantunala grischuna. El è cussegliader d'interpresas independent ed è engaschà en differents cussegls administrativs. A l'Universitad da Friburg ha el studegià giurisprudenza e terminà il studi cun il doctorat. El posseda la patenta d'advocat ed è ultra da quai in manager d'immobiglias versà.
Michèle F. Sutter-Rüdisser è dapi l'onn 2021 commembra dal Cussegl da banca. Ella è professuressa d'economia a la School of Management da l'Universitad da Son Gagl ed è engaschada en differents cussegls administrativs. A l'Universitad da Son Gagl ha ella studegià economia da manaschi e terminà il studi cun il doctorat. Ella ha experientscha da plirs onns ed enconuschientschas fundadas da l'industria da bancas e d'assicuranzas.
La Regenza elegia las commembras ed ils commembers dal Cussegl da banca. En quest connex resguarda ella ses profil d'exigenzas per il Cussegl da banca da la BCG sco er las prescripziuns da l'Autoritad federala per la surveglianza dals martgads da finanzas (FINMA).
Il Cussegl da banca è l'organ suprem da la BCG. Il gremi da set persunas surveglia e controllescha la gestiun. Plinavant fixescha el l'orientaziun strategica, la politica da ristgas sco er l'urden reglamentar fundamental da la banca.
Fotografias agiuntadas:
Infurmaziuns:
Cusseglier guvernativ dr. Christian Rathgeb, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch
Responsabladad: Regenza